Брюсселда бир ҳафтада ичида тўртинчи отишма юз берди

Ҳодиса оқибатида бир киши ҳалок бўлган. Полиция версиясига кўра, ҳудудда наркотўдалар ўртасида кураш кетаётган бўлиши мумкин.

Фото: The Brussels Times

Белгия пойтахти ҳудудига кирувчи Петербос коммунасида содир бўлган отишма оқибатида бир киши ҳалок бўлди. Бу ҳақда коммуна мэри Фабрис Кумпс маълум қилди, деб ёзади The Brussels Times.

Полиция маълумотларига кўра, отишма Петербосдаги турар-жой мажмуасининг 14-блоки яқинида содир бўлган. Ҳалок бўлган фуқаронинг шахси ҳозирча аниқланмаган, ҳолат бўйича тергов ишлари олиб борилмоқда, ҳодиса жойида тергов судялари ва криминалист экспертлар ишлаяпти.

Бу Брюсселда уч кун ичида содир бўлган тўртинчи отишма. Полиция мазкур ҳолатлар наркотўдалар ўртасидаги кураш билан боғлиқлигини истисно этмаяпти.

Вазият кескинлашгани фонида Белгия ички ишлар ва адлия вазирлари Брюсселдаги полициячилар шайлиги кучайтирилиши ҳамда ноқонуний қурол савдосига қарши кураш фаоллаштирилишини эълон қилди.

Андрелахт мэри федерал ҳукуматдан жиноий тўдаларни йўқ қилиш учун қўшимча ресурслар тақдим этишни сўради. Брюсселда йилдан йилга гиёҳванд моддалар савдоси ва унга боғлиқ отишмалар ортиб бормоқда, аммо бу турдаги жиноий фаолият ўтган йилдан бошлаб янада кучайган.

Эслатиб ўтамиз, 4 феврал куни Швеция марказий қисмида, пойтахт Стокҳолмдан 200 км ғарбдаги Эребру шаҳрида болалар мактаби билан ёнма-ён жойлашган катта ёшлилар учун ўқув марказида отишма рўй берган ва ҳодиса оқибатида 11 киши ҳалок бўлган эди.

#отишма #Брюссел