Қурбонларнинг жами сони – тўққиз нафарни ташкил этмоқда: ҳужум уюштирган ўсмир, унинг бобоси ва бувиси, мактабдаги уч нафар ўқитувчи ва уч нафар ўқувчи, дейилади AFP агентлиги полициячиларга таяниб берган хабарда.
Мамлакат соғлиқни сақлаш вазири Паттан Промпхат эса мактабда ҳалок бўлганларнинг барчаси ўқитувчилар бўлгани ва қурбонлар сони беш нафарлигини айтган. Шу тариқа, унинг версиясига кўра, жами қурбонлар сони саккиз нафар чиқмоқда: беш нафар ўқитувчи, ҳужум уюштирган ўсмир, унинг бобоси ва бувиси.
Дастлабки хабарларда жабрланганлардан икки нафари оғир аҳволда экани айтилганди. Ўқувчилар ҳамда мактаб ходимлари эвакуация қилинган. Фавқулодда хизматлар томонидан тарқатилган фотосуратларда бир киши тез ёрдам яқинидаги замбилда ётгани, яна бир кишига шифокор тиббий ёрдам кўрсатаётгани акс этган. Reuters агентлиги ёзишича, ярадорлар машиналарга олиб чиқилганида ўқитувчилар бир-бирини бағрига босиб йиғлашган. Ички ишлар ўринбосари Полапи Сувунчви маҳаллий Thai PBS телеканалига берган интервюсида қурбонлар орасида ўқитувчилар ҳам, ўқувчилар ҳам борлигини айтган.
Маҳаллий вақт билан эрталабки соат 10 атрофида (Тошкент вақти билан соат 8:00) Бангкокдан шимолдаги Нонтхабури провинциясининг Банг-Круай округида жойлашган Тхепсирин мактабида ўқувчиларга қарата ўт очилган.
Полиция маълумотига кўра, ўт очган шахс ҳалок бўлган. Reuters хабарида айтилишича, у ўз жонига қасд қилган. Нонтхабури провинцияси полицияси бошлиғи Дечрапи Конгди BBC мухбирига у шу мактабнинг тўққизинчи синфида ўқиганини айтган. Таиландда тўққизинчи синф ўқувчилари одатда 14 ёшда бўлади. Полапи Сувунчви у тўппончадан фойдалангани, ички ишлар вазирлиги у бу қуролни қандай қўлга киритганини ўрганаётганини айтган. Кейинроқ полиция у томонидан фойдаланилган 9 мм калибрли тўппонча унинг шу мактабда ўқитувчилик қилган бобосига тегишли бўлганини маълум қилди.
Маҳаллий нашрларда эълон қилинган фотосуратларда гумонланувчи сиёҳранг мактаб формасида бўлгани ва елкасида қора сумка осилганини, унинг атрофида гилзалар ётганини кўриш мумкин.
Воқеа гувоҳи бўлган еттинчи синф ўқувчиси журналистларга хоналар оралаб юрган ўқувчини кўрганида ўз синфхонасида бўлгани, синфхона эшиги олдида турган ўқитувчи отиб ташлангани, шундан кейин ўзи бир амаллаб воқеа қочиб кетганини айтиб берган.
Фавқулодда хизматларнинг 47 ёшли ходими Киатикхун Верапонгпрадит Reuters агентлигига отишма давом этаётган пайтда воқеа жойига етиб келгани ва унинг жамоаси жароҳатланган ўқувчиларга ёрдам бераётганини айтган. Улар мактабнинг юқори қаватида эркак ўқитувчининг жасадини, бошқа хонада эса кўкраги ва қўлидан жароҳатланган ўқитувчини топишган.
