Гуржистонда намойишчиларга нисбатан жазо кучайтирилди

Гуржистонда намойишчиларга нисбатан жазо чораларини кучайтирувчи тузатишлар кучга кирди, деб хабар берди 7 феврал, жума куни маҳаллий ОАВ. Бир кун аввал ҳукмрон «Гуржистон орзуси» партияси депутатлари томонидан тезлаштирилган тарзда қабул қилинган қонунчилик пакети аллақачон мамлакат президенти Михаил Кавелашвили томонидан имзоланиб, эълон қилинган.

Paper Kartuli нашрининг ёзишича, Гуржистон Маъмурий жавобгарлик тўғрисидаги кодексига мансабдор шахсларни ҳақорат қилиш бўйича маъмурий модда қўшилган бўлиб, у 45 суткагача қамоққа олиш ёки 4000 ларигача (тахминан 1400 доллар) жарима солишни назарда тутади. Жиноят кодексига киритилган ўзгартиришлар полиция ходимларига бўйсунмаслик, таҳдид ва ҳужумлар ҳақидаги моддаларга тегишли. Ушбу жиноятлар учун қамоқ жазоси оширилди. Зўравонликка оммавий чақириқлар энди қамоқ билан ҳам жазоланиши мумкин.

Митинглар ўтказиш қоидаларига ўзгартиришлар киритилди

Баъзи тузатишлар митинг ва норозилик намойишларини ўтказиш қоидаларига тегишли. Энди, жазо таҳдиди остида, намойишчиларга кўприклар, темирйўллар, автомобил йўллари, туннеллар ва «муниципалитет томонидан белгиланган» транспорт узелларини тўсиб қўйишга рухсат берилмайди. Шунингдек, фуқароларнинг ўтишига тўсқинлик қилиш ва полиция тўхтатиб қўйишни талаб қилган акцияда қатнашиш тақиқланади.

Бундан ташқари, майда безорилик ва бузғунчилик, полиция ходимига бўйсунмаслик ёки ҳақорат қилиш, митинг қоидаларига риоя қилмаслик, маъмурий бинолар ва йўлларни тўсиб қўйиш, намойишларда ниқоб ва лазерлардан фойдаланиш учун жарима ва маъмурий қамоққа олиш муддатлари оширилмоқда.