Россияни энг узоқ вақт бошқариш бўйича Брежневнинг натижасини янгилаб, иккинчи ўринга кўтарилган Владимир Путин 2019 йил Украинадаги сайловни ютиб президент бўлган Володимир Зеленскийни нолегитим деб аташни шаблон риторикага айлантирди. Бу гап Доналд Трампга шунчалик ёқиб қолдики, охирги чиқишларида уни тез-тез такрорлаяпти.
Чиндан Зеленскийнинг президентлик ваколатлари ўтган йил тугаши, 2024 йил 31 март куни сайлов ўтказилиши керак эди. Бироқ Киев уруш ҳолатида бўлгани учун сайловни бекор қилган. Энди кимсан Америка ва Россия Киевдан сайлов ўтказишни талаб қилмоқда. Москва Зеленский сайловда юта олмаслигига Вашингтонни астойдил ишонтирган кўринади. Бўлмаса Трамп Зеленскийнинг рейтинги 4 фоизга тушиб кетган деб айтмаган бўларди.
Украинани сайловга ундашдан асосий мақсад эса табиийки, Москвага мойил номзод ғолиб бўлишига умид қилишдир. Балки бирор ўйлаб қўйганлари ҳам бордир, ахир Киевдан сайлов ўтказишни талаб қилаётган одамлар орасида сайловда ютишнинг пири бўлиб кетган гигант сиёсатчилар бор.
Хўш, Украинада сайлов бўлса, унда кимлар қатнашиши ва ғолиб бўлиши мумкин? Бу борада ҳозирча ҳеч кимда аниқ тасаввур йўқ. Биз ҳам фақат охирги сўровларга асосланган тахминларни келтирамиз.
Валерий Залужний
Украина қуролли кучлари собиқ бош қўмондони, ҳозир мамлакатнинг Киевдаги элчиси бўлиб ишлаётган Валерий Залужний ҳеч қандай пиар кампания олиб бормайди, унинг имижи устида политтехнологлар ишламайди, элчихонага ҳам шевронли яшил курткада бориб қўяверади. Аммо генерал Залужний шубҳасиз 2022 йил 24 февралдан буён украинлар энг қаттиқ ишонадиган одам. Ахир саросимага тушган мамлакат капитуляция бўлишига йўл қўймай уни сақлаб қолган қўмондон айнан Валерий Залужний эди. Унинг хизматларини Зеленский ҳам кўп марта таъкидлаган.
Active Group ўтказган сўровга кўра, украинлар ишонч билдириши бўйича энг юқори кўрсаткич ҳамон Залужнийга тегишли. Унинг рейтинги 61 фоиздан баландроқ ва бу жуда зўр кўрсаткич. Журналистлар Залужнийдан сайловда қатнашасизми деб сўрашди, генерал ҳозир бу ҳақда гапирадиган вақт эмаслигини айтди.
Кирило Буданов
Худди шу ижтимоий ташкилот ўтказган сўровга кўра 50 фоиздан кўпроқ украиналиклар мамлакат бош разведкачиси Кирило Будановга ишонади. Генерал Буданов 2020 йилдан буён Украина мудофаа вазирлиги разведка бошқармаси раҳбари вазифасида ишлаб келади.
