ХОҚ россиялик ва беларуслик спортчиларни Олимпиадага қайтаришга ҳаракат қилмоқда – ОАВ

Халқаро олимпия қўмитаси (ХОҚ) халқаро қишки спорт федерацияларини россиялик ва беларуслик спортчиларга келаси йилги қишки Олимпиада ўйинларига йўлланма қўлга киритишга рухсат беришга чақирди. Бу ҳақда Швециянинг SVT Sport нашри Халқаро биатлон иттифоқидаги ўз манбаларига таяниб хабар берди.

Россия Украинага кенг миқёсли босқинни бошлаганидан бери россиялик ва беларуслик спортчилар бир қанча йирик қишки спорт федерацияларидан чиқариб юборилган эди. Уларга, хусусан, биатлон, тоғ чанғиси ва чанғи спорти бўйича Жаҳон кубогида қатнашиш тақиқланган. Шунингдек, Халқаро хоккей федерациясидан четлатилган.

Энди, агар спорт федерациялари ХОҚ чақириғини инобатга олса, россияликлар ва беларуслар келаси йилги қишки Олимпиада ўйинларида қатнашиш имкониятига эга бўлади.

2024 йили Парижда бўлиб ўтган ёзги Олимпиада ўйинларида 15 нафар россиялик спортчи нейтрал байроқ остида қатнашди. Айнан шу схемани ХОҚ 2026 йилги қишки Олимпиада ўйинларида амалга оширмоқчи, бироқ бу ҳақиқатга айланиши учун Россия ва Беларус спортчилари ўз спорт турлари бўйича халқаро федерациялар орқали саралашдан ўтиши керак.

«Бугунги қароримиз шуки, Россия ва Беларус аъзоликдан тўхтатилган, шунинг учун бу биз муҳокама қилаётган нарса эмас», деди Халқаро биатлон иттифоқи президенти Олле Далин.

ХОҚ вакилининг изоҳ беришича, Париж Олимпиадаси нейтрал спортчилар бошқалар билан бир қаторда беллашганининг муваффақиятли намунаси бўлган. ХОҚ раҳбарияти 2026 йилги Олимпиадада нейтрал спортчилар бўйича алоҳида қарор қабул қилади.