Чеченистон ва Доғистонда Telegram блокланди

Доғистон ва Чеченистонда Telegram мессенжери блокланди. Бу ҳақда Доғистон рақамли ривожланиш вазири Юрий Ҳамзатов маълум қилди. Унинг таъкидлашича, мессенжер ҳуқуқ-тартибот органлари ташаббуси билан хавфсизликни таъминлаш мақсадида блокланган.

«Шимолий Кавказ федерал округининг икки минтақаси — Чеченистон ва Доғистонда Telegramʼнинг блокланиши ҳуқуқ-тартибот органларининг талабига кўра, федерал даражада қабул қилинди», — дейди Ҳамзатов.

Унинг тушунтиришича, «душманлар мессенжердан тез-тез» мамлакат ичидаги вазиятни беқарорлаштиришда фойдаланиб келади. Вазир бунга 2023 йил Маҳачқалъа аэропортида содир бўлган тартибсизликни мисол сифатида келтирган. Ҳамзатов минтақа аҳолисига муқобил платформаларда, хусусан, «ВКонтакте» мессенжеридан фойдаланишни тавсия қилди. Шу билан бирга, вазир келажакда чекловлар олиб ташланиши мумкинлигини ҳам истисно этмади.

Доғистонда Telegramʼга кириш билан боғлиқ муаммолар 2024 йил кузда ҳам кузатилган. Фойдаланувчилар хабар ва медиафайлларни юклай олмаётганидан шикоят қилганди. Мессенжер фаолиятидаги узилишлар нафақат Доғистон, балки Чеченистон ва Ингушетияда ҳам кузатилган. Бу Wildberris атрофидаги можаролар сабаб Чеченистон етакчиси Рамзан Қодиров қонли қасос эълон қилган сенатор Сулаймон Керимовни қўллаб-қувватлаш постлари кенг тарқалган вақтда юз берган эди. Россия рақамли ривожланиш вазири Мақсут Шадаев ўшанда «алоқа билан бирор-бир муаммолар борлигини» рад этганди.