Путин: «Курскда асир тушганларга террорчилардек муносабатда бўлинади»

Россия президенти Владимир Путин 12 март куни, Украина ўтган йил августда бостириб кирганидан кейин илк марта Курск областига борди. Путин Курскка армия олий бош қўмондони сифатида ҳарбий кийимда борган.

Илк марта камфуляжда

Путин кеча Курскка ташрифи вақтида уруш бошланганидан буён илк марта камфуляжда кўриниш берди. Бунгача у ҳарбийлар билан барча учрашувларда костюмда қатнашаётганди. Бироқ Путин кийган комфуляжда қон гуруҳи, ҳарбий хизматчининг исми ва ҳарбий даражаси кўрсатилган шевронлар ёпиштирилмаганди. Билсангиз керак, Путин КГБ ва ФСБдаги фаолияти давомида полковник даражасигача кўтарилган. Лекин ўтган аср охирида генерал даражасини олишга улгурмай, аввалига ФСБ директори, кейин ҳукумат раҳбари ва ундан кейин президент лавозимигача кўтарилади.

Путинни Курскдаги бошқарув штабида уруш давомида амалда армияни бошқараётган штаб бошлиғи Валерий Герасимов кутиб олди. Ташрифдан илк кадрлар президент пулидаги асосий журналист Павел Зарубиннинг каналида пайдо бўлди.

«Асирларга террорчи деб қараймиз»

Ташриф давомида штаб бошлиғи Герасимов Украина Курскда 67 мингдан ортиқ ҳарбийсини йўқотгани, 400 украин асир тушгани ҳақида ҳисобот берди. Шунингдек, Украина Курскда эгаллаб олган ҳудудлардан 86 фоизи қайтиб олинганини айтди. Герасимовга кўра, охирги 5 кунда руслар Курскдаги 24 та аҳоли пунктларини, яъни 259 километр квадрат ҳудудни қайтиб олган. Алоҳида ҳудудларда руслар Украина чегарасига чиққан.

Кремл саҳифаларида эълон қилинган видеода Путин навбатдаги марта Украина чегараси атрофида хавфсизлик зонаси ташкил қилиш масаласини ўйлаб кўриш кераклиги, шунингдек, Курскка бостириб кирган украинлар орасида асир олинганларга террорчилардек муносабатда бўлинишини айтди.

Музокара олдидан

Путиннинг Курскка боргани ҳарбий ва сиёсий аҳамиятга эга воқеа. Ҳарбий жиҳатдан табиийки, Курск энди хавфсиз деган маънони билдириб, Россия тез орада халқаро тан олинган ҳудудини қайтиб олишидан далолат. Сиёсий жиҳатдан эса Путин Трамп бошчилик музокарачиларга сигнал юбориб, ҳеч қандай ён бериш бўлмаслигини билдирди. Яъни жаноблар, мен полководец сифатида ғалаба кетидан ғалаба қозоняпман, сизнинг Украинангиз музокарада фойдаланмоқчи бўлган Курскни ҳам қайтиб олдим, энди шартни мен қўяман, деяпти.

Россия ҳозир чиндан кучли позицияда. Украина эса фақат ўзи ишлаб чиқарган дронлар билан Россияга ҳужум қилишни уддалаяпти. Бундай ҳолатда Россияни ён беришга ундаш имконсиз. Бунинг устига музокаранинг энг тепасида турган Доналд Трамп келганидан бери Путиннинг позициясига зид гап айтгани йўқ, айтмаса ҳам керак. Чунки Трамп Путинга қарши борса, уруш чўзилиб кетади, АҚШ президенти эса урушни тезда тугатишини айтиб «катта кетиб қўйган».

Аввалроқ Ар Риёздаги АҚШ ва Украина ўртасидаги учрашувдан кейин Киев 30 кунлик ўт очишни тўхтатиш режимига рози бўлганини эълон қилганди. Кремл сўзчиси Дмитрий Песковнинг айтишича, бугун Путин шу масалада Россиянинг позицияси ҳақида чиқиш қилиши мумкин.

Рус нашрлари президент маъмуриятига яқин манбаларга таяниб ёзишича, Путин келишувни расмиятчилик учун очиқ рад қилмайди, лекин Киев бажара олмайдиган шартлар қўяди. «Путин шу тариқа Украинани ўртадан чиқариб, тўғридан тўғри Америка билан гаплашмоқчи», деб ёзган хусусан «Верстка» нашри. Биз воқеалар ривожини кузатиб борамиз. Бодроқни ғамлаб қўяверинг.

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.