Россияга тарихий тангалар ва кўкрак нишонларини яширинча олиб кетаётган шахс ушланди

Вилоят Божхона бошқармаси маълум қилишича, “Бухоро аэропорти” чегара божхона пости ва Авиация хавфсизлиги хизмати ходимларининг ўзаро ҳамкорлигида қимматбаҳо металлардан ясалган заргарлик буюмлари ҳамда маданий бойликларни ноқонуний равишда хорижга олиб чиқишга уриниш бартараф этилди.

Бухоро - Санкт-Петербург йўналишидаги авиарейс орқали хорижга учиб кетмоқчи бўлган фуқаро умумий қиймати 165 миллион сўм бўлган заргарлик буюмларини божхона ходимининг оғзаки сўровида маълум қилмаган ва йўловчи божхона декларациясида қайд этмаган.

Натижада олиб чиқиш меъёридан ортиқча бўлган жами 37 дона, оғирлиги 226,04 грамм бўлган заргарлик буюмлари ҳамда тарихий аҳамиятга эга 16 дона кўкрак нишонлари ва тангалар аниқланиб, ашёвий далил сифатида вақтинча сақловга олинди.

Ҳозирда мазкур ҳолат юзасидан божхона органлари томонидан тегишли тартибда иш олиб борилмоқда.