Марсда рекорд даражада узун органик молекулалар топилди

АҚШ, Мексика ва Испания вакилларидан иборат халқаро олимлар жамоаси Марс тупроғидан ҳозирга қадар маълум бўлган энг узун органик молекулани топди. Тадқиқот натижалари Proceedings of the National Academy of Sciences илмий журналида эълон қилинган.

Қайд этилишича, бу 12 та кетма-кет углерод атомини ўз ичига олган углерод занжири бўлиб, у ўз хусусияти бўйича Ерда биологик фаоллик натижасида ҳосил бўладиган ёғ кислоталарини эслатади.

Кашфиёт 2012 йилдан бери Гейл кратерини тадқиқ этаётган NASA’нинг Cуриоситй марсоходи бортидаги SAM асбоби ёрдамида амалга оширилган. Топилманинг алоҳида қиймати у тахминан 3,7 миллиард йил олдинги даврга тегишли эканида. Бу Ерда ҳаёт эндигина шакллана бошлаган даврга тўғри келади. Органиканинг бунчалик яхши сақланиб қолгани геологик фаоллик йўқлиги ҳамда Марснинг совуқ ва қуруқ иқлими билан изоҳланмоқда.

Топилган молекулалар Қизил сайёрада қадимий ҳаёт изларини қидириш учун янги имкониятлар тақдим этади. Улар келгуси миссиялар мақсадларини аниқлаштиришга ёрдам беради, жумладан, Европанинг ExoMars (2028 йилда учирилиши режалаштирилган) ҳамда NASA ва ESA ҳамкорлигида Марс тупроғи намунасини Ерга олиб келиш лойиҳаси (2030 йиллар).

Молекулаларнинг биологик келиб чиқиши ҳали исботланмаган бўлса-да, уларнинг мавжудлиги Марсда ҳаётнинг пайдо бўлишига олиб келишга қодир мураккаб органик кимё бўлганини тасдиқлайди.