Кун подкастининг бу галги сонида Ўзбекистон миллий жамоаси бош мураббийи Темур Кападзе билан 2026 йилги Жаҳон чемпионатига чиқиш имконияти, Сречко Катанецдан сўнг жамоада амалга оширилган ишлар, Қирғизистон ва Эронга қарши ўтказилган учрашувлар, футболчиларнинг жисмоний ва руҳий ҳолати, июн ойида бўлиб ўтадиган навбатдаги муҳим ўйинларга тайёргарлик ва бошқа мавзуларда суҳбатлашилди.
Шу йил январ ойида Ўзбекистон миллий жамоасининг собиқ бош мураббийи Сречко Катанец соғлиғи билан боғлиқ муаммолар сабаб Ўзбекистон футбол ассоциацияси билан тузилган шартномани ўзаро розилик билан бекор қилганди.
Катанец истеъфосидан сўнг футбол тарихида илк бор Ўзбекистон олимпия жамоасини олимпиадага олиб чиққан ва якунда Ўзбекистонда йилнинг энг яхши мураббийи сифатида эътироф этилган Темур Кападзе бош мураббийликка тайинланганди.
Шу кунларда Осиё мамлакатлари ўртасида ЖЧ-2026 учун саралаш босқичи кетмоқда. Бугунгача Ўзбекистон бир нечта ўйинларни ҳам ўтказди. Кун подкасти ижодкорлари актуалликдан келиб чиқиб Кападзе билан суҳбат уюштирди. Қуйида интервюдан айрим парчалар келтирилади.
– Охирги 2 та: Қирғизистон ва Эронга қарши ўйиндан кейин ҳозирги ҳолатингиз қандай? Икки учрашувда нималарни яшаб ўтдингиз?
– Икки ўйиндан ҳам барибир ёмон ўтмадик, Худога шукур. Биринчи навбатда, албатта, масъулият, ҳаммасини тушуниб турибмиз. Ташвиш вақт зиқлигида бўлди, бу жамоани мен энди қабул қилдим десам ҳам бўлади, ундан олдинги йиғинда деярли бошқа футболчилар эди, бу йиғинга энди қўшилишди, тўғри, биз ўн олтинчи [сана]да “збор”га кирдик, лекин кечга яқин кирдик.
Футболчилар ўн еттинчи ёки ўн саккизинчида келди. Уларнинг ҳаммаси деярли 2 кун олдин йиғилди, унда ҳам ўн саккизинчида деярли тўлиқ машғулот ўтказа олмадик, тактик машқларни бажаришга ҳаракат қилдик. Лекин айрим футболчилар йўлдан келгани учун унақа катта босим қилмадик ёки охиригача машғулотни ўтказа олмадик. Фақат бир кун, яъни ўйиндан олдинги машғулот [қилинди], унда ҳам бир соат берилади. Мана шуларни тушунган ҳолда, албатта, ўн етти ва ўн саккизинчида келишгандан кейин, уларни биринчи навбатда тиклаш билан овора бўлдик.
Чунки ҳаммаси ўйинлардан кейин келяпти, йўлдан келишяпти. Инсон барибир тирик жон, ўйиндан кейин йўлга чиқиш бор, кечаси билан училади, янаям Европадан тўғридан тўғри рейслар эмас. Биласизлар, Туркия орқали ёки, албатта, орасида яна бошқа транзит йўллари бор. Унинг устига соатида фарқи бор, иқлим – ҳаммаси [таъсир қилади]. Балки четдан осон туюлиши мумкин, лекин футболчиларга 2 кундан кейин йўлдан келиб, майдонга чиқиш, бу – мослашиладиган жараён. Чунки Элдор деймизми, бошқаларми – улар оптимал формасини ҳис қилмайди. Бунинг устига Қирғизистонга қарши ўйинни тушунтириш керак, эски ўйинларни теорияда кўрсатиб, камчиликларимиз қандай бўлган, улар нима орқали ўйнаяпти, биз нима орқали ўйнасак бўлади – бу нарсаларни тушунтиришга, майдонда ўша вазиятларни жараёнда бажаришга ҳаракат қилдик.
