Тошкентдаги омборхонада юз берган катта ёнғин ўчирилди

Уни ўчириш учун 12 та ёнғин-қутқарув экипажи 2,5 соат ҳаракат қилди.

Фото: Видеодан кадр

Тошкент шаҳри, Сергели туманида 14 май куни содир бўлган катта ёнғин бартараф этилди.

ФВВ хабарига кўра, 14 май куни соат 11:03 да Сергели тумани, Нилуфар кўчасида жойлашган омборхонада ёнғин содир бўлаётгани тўғрисида мурожаат келиб тушган.

Хабарга асосан, соат 11:05 да 12 та ёнғин-қутқарув экипажи ёнғин жойига етиб борган ва уни бартараф этишга киришган.

Ёнғин соат 12:15 да қуршаб олинган ва соат 13:31 да батамом ўчирилган.

Таъкидланишича, ёнғинни бартараф этиш ишлари Фавқулодда вазиятлар вазири Б.Қудратхўжаев ва унинг биринчи ўринбосари С.Зупаров бошчилигида амалга оширилди.

Тан жароҳати олганлар тўғрисида маълумот келиб тушмаган.

Ёнғинни келтириб чиқарган сабаблар ҳамда етказилган зарар миқдори аниқланмоқда.