Италия 400 та фойдаланишдан чиқарилган зирҳли транспортёрини Украинага беради

Il Messaggero ва Defence Express хабарларига кўра, Рим Киевга 11-ҳарбий ёрдам пакети доирасида 400 га яқин фойдаланишдан чиқарилган VCC-2 Camilino зирҳли транспортёрларини юборади.

Фото: Александр Ратушняк / Reuters

Италия Украинага 400 га яқин М113 бронетранспортёрларини (БТР) топширади. Бу ҳақда Италиянинг Il Messaggero газетаси хабар берди. Украинанинг Defence Express ҳарбий портали 18 май, якшанба куни аниқлик киритишича, бу VCC-2 Camilino модели бўлиб, у Американинг М113 зирҳли транспортёрининг М113А1 русумли модернизациясидир.

Техникаларни топшириш Италия мудофаа вазири Гвидо Кросетто бошчилигидаги мудофаа вазирлиги томонидан тайёрланган Украинага ҳарбий ёрдамнинг 11-пакети доирасида амалга оширилиши кутилмоқда.

VCC-2 Camilino ён томонларда қўшимча ҳимоя ва очиқ минорага эга бўлди, деди Defence Express мутахассислари.

Италияда 1200 тагача М113 БТР VCC-2 Camilino версиясига янгиланиши мумкин. Defence Express портали маълум қилишича, техникалар маълум вақтдан бери хизмат кўрсатмайди — улар тўрт йил олдин фойдаланишдан чиқарилган, 478 таси омборда қолган. Шундай қилиб, Рим, эҳтимол, Киевга захирада бўлган ушбу модификациядаги деярли барча зирҳли транспорт воситаларини юборади.