Германияда бошпана сўраб мурожаат қилганлар сони деярли икки баробар камайди

2025 йилнинг биринчи ярмида Германияда бошпана олиш учун 65,5 минг ариза топширилди, бу бир йил аввалгига нисбатан 43 фоизга кам, деб ёзади Welt am Sonntag Европа Иттифоқининг ички ҳисоботига таяниб.

Фото: Peter Jülich/epd

Германияда бошпана сўраб мурожаат қилинганлар сони кескин камайди. Жорий йилнинг 1 январидан 30 июнигача бўлган даврда 65 495 та ариза топширилди, бу 2024 йилнинг шу даврига нисбатан деярли 43 фоизга кам, дея хабар берди Welt am Sonntag газетаси 5 июл, шанба куни Европа Иттифоқининг бошпана агентлиги (EUAA)маълумотларига таяниб.

Бу рақамлар Европа Комиссиясининг 2025 йил 3 июлдаги немис газетасида мавжуд бўлган ички ҳисоботида келтирилган.

Германия кўп йиллар давомида биринчи марта бошпана сўраб мурожаат қилганлар сони бўйича етакчи сифатида қайд этилмади. Уни 2025 йилнинг биринчи олти ойида 76 020 бошпана изловчини қабул қилган Испания ва 75 428 бошпана изловчи билан Франция ортда қолдирди. Бошпана мурожаатлари сони бўйича дастлабки олти давлатга Италия (62 534 киши), Греция (27 718) ва Белгия (17 285) ҳам киради. Рўйхатни Литва (152 та бошпана сўрови), Словакия (84 та ариза) ва Венгрия (47 та ариза) ёпган.

2025 йилнинг биринчи ярмида Европа Иттифоқи мамлакатлари, Норвегия ва Швейцариядан бошпана сўраб жами 388 299 киши мурожаат қилган. Бу 2024 йилнинг шу даврига нисбатан 23 фоизга кам. Мурожаат қилганларнинг кўпчилиги Венесуэла (48 413), Афғонистон (41 127) ва Суриядан (23 700) келган. Венесуэлаликларнинг аксарияти Испанияда, афғонлар ва сурияликлар эса Германияда мурожаат билан чиққан.