2 йилда республикада ўрнатилган лифтларнинг 78 фоизи техник синовдан ўтказилмаган

Сўнгги 2 йилда республикада ўрнатилган 11,4 мингта лифтнинг 8,9 мингтаси (78 фоиз) техник синовдан ўтказилмаган. Бу ҳақда Техник жиҳатдан тартибга солиш агентлиги ахборот хизмати раҳбари Рауфжон Расулов маълум қилди.

Фото: ТАСС/Евгений Епанчинцев

Бундан ташқари, 6 мингтаси (52 фоизи)нинг техник паспорти ҳамда 7,4 мингтасида (65 фоиз) техник хизмат кўрсатувчи мавжуд эмас.

Лифтларни хавфсизлигини таъминлаш соҳасини тартибга солиш мақсадида, ушбу соҳада самарали тизимни жорий этган Европа Иттифоқи ва Туркия тажрибаси асосида, Ўзбекистонда халқаро талабларга тўлиқ мувофиқ бўлган ва лифтларнинг бутун ҳаёт цикли, лойиҳалашдан тортиб утилизациягача бўлган босқичларда хавфсизликни таъминлашга қаратилган бутунлай янгича тизим жорий қилинмоқда.

Амалда республикада ўрнатилган лифтларда сервис хизматлари ҳамда техник кўрикларини ўтказиш самарасиз бўлган. Ривожланган илғор мамлакатларнинг (Туркия, Хитой, Бирлашган Араб Амирликлари) самара бериб келаётган бой тажрибасига асосланган ҳолда биноларга ўрнатилган лифтларнинг сервис ва техник кўрикдан ўтказиш бўйича янги амалиёт жорий этилмоқда.