Яна тўрт кундан кейин АҚШнинг Аляска штатида охирги йилларнинг энг муҳим учрашуви доирасида Доналд Трамп Россия президенти Путин билан Украинадаги урушни муҳокама қилади. Бу учрашувда уруш тугаши мумкин. Бу учрашувдан кейин уруш баттар авж олиши ҳам мумкин. Ишончли манбалар тарқатаётган хабарларга кўра, Трамп Украина ерларини Россияга «совға қилмоқчига» ўхшайди. Лекин Украина бир қарич ерини ҳам бермоқчи эмас. Қуйида шу ҳақда.
Трамп нуқта қўймоқчи
Биз аввалги видеоларимизда айтганимиздек, Трамп учун бу урушда ким ютишининг, қайси давлат ерини қайси давлатга беришининг умуман қизиғи йўқ. Украинадаги урушни тугатиш Трамп учун тухум ва бензин нархини тушириш, Ню Йорк кўчаларига қўшимча чиқинди қутилари ўрнатиш ёки АҚШда тонировкани бепул қилиш каби сайловчиларга ваъда қилинган оддий иш, бундан ортиғи эмас.
Шу сабаб Трампнинг тоқати тоқ бўлгани руслардан кўра кўпроқ украинларни қўрқитмоқда. Чунки русларга босим қилиш, Россияни жанг майдонида мағлуб этиш Трамп учун қулай вариант эмас, бунга жуда кўп вақт кетади. Лекин Украинага босим қилиш, Киевни ўз ерларини Россияга топширишга мажбурлаш урушни тугатишнинг энг қисқа йўли. Агар Украина бунга қаршилик қилса, Трамп унинг бошига оғир кунларни солади. Ишонинг, бу Америка президентининг қўлидан келади. Трамп ўзининг гапига кириб урушни тўхтатмаган Украинага жаҳл қилиб Россияга HIMARS юборса ҳам ажабланманг.
Демак, Аляскадаги музокараларнинг биринчи сценарийси шу – Трамп Путин билан келишиб, Украинага босим қилиш орқали унинг ерларини Россияга олиб беришга уриниши мумкин. Украина президенти Зеленский охирги кунларда бир нечта видео эълон қилиб, Киев ўз ерларини бермаслигини бежизга айтгани йўқ. Унинг энг яқин мулозими Ермак Лондонда АҚШ вице-президенти Вэнс билан мулоқот қилди ва Зеленский катта эҳтимол Вашингтоннинг ниятидан бохабар. Шу сабаб украин ерларини қўшқўллаб топширишга ҳеч кимнинг ҳаққи йўқлигини айтмоқда.
Иккинчи сценарий: Россия ҳам чекинади
Агар Трамп чиндан Американинг кучини кўрсатиб, Путинга реал босим қила олса, Аляскадаги учрашувдан кейин Россия ҳам ҳудудий ён бериши мумкин. Яъни айтайлик Украина Донецк ва Луҳанскни мажбуран русларга топширадиган бўлса, Россия Херсон ва Запорижжядан чиқиб кетиши мумкин. Яна такрорлайман, агар Трамп Россияга етарли босим қила олса. Шахсан мен бунга ишонмайман. Путин Россия умуман орқага тисарилмаслигини кўп марта айтди, лекин Россия пропагандаси учун Херсон ва Запорижжядан чиқишни мағлубият эмас, «жест доброй воли» деб кўрсатиш қийинчилик туғдирмайди. Суровикин Херсонда дарёнинг нариги томонига чекинишганини қандай хотиржамлик билан эълон қилгани эсингизда бўлса керак.
