Ўзбекистон ва Қозоғистон авиақатновлар сонини кўпайтиришга келишиб олди

Марказий Осиё – Хитой (С5+1) фуқаро авиацияси соҳасида ҳамкорлик бўйича ишчи гуруҳининг иккинчи конференцияси доирасида Ўзбекистон Республикаси ва Қозоғистон Республикаси авиация маъмурлари ўртасида музокаралар ўтказилди.

Фото: Транспорт вазирлиги

Транспорт вазирлиги хабарига кўра, музокаралар давомида Ўзбекистон ва Қозоғистон ўртасидаги мунтазам авиақатновлар сонини ошириш бўйича келишувга эришилди.

Эришилган келишувларга кўра, икки давлатнинг тайинланган ташувчиларига Олмаота – Тошкент ва Нур-Султон – Тошкент йўналишларининг ҳар бири бўйича ҳафтасига 42 тагача рейсни амалга оширишга рухсат берилди. Қолган барча йўналишларда ҳафтасига 7 тагача рейс бажаришга рухсат этилди.

Томонларнинг тайинланган авиакомпаниялари Ўзбекистон ва Қозоғистон ўртасидаги барча келишилган йўналишлар бўйича мунтазам парвозларни амалга оширган тақдирда, парвозларнинг рухсат этилган частотаси ҳафтасига 238 та рейсни ташкил этади.

Шунингдек, томонлар мамлакатлар ўртасида мунтазам авиақатновларни амалга ошириш учун белгиланган манзиллар сонини кўпайтиришга келишиб олдилар.

#Ўзбекистон #Қозоғистон

Kun.uz янгиликларини Google News'да кузатинг

+ Обуна бўлиш