Қўшимча функционаллар
-
Тунги кўриниш
«Дунёдаги энг меҳрибон судья» 88 ёшида саратондан вафот этди
Суд залидаги раҳмдиллиги ва кечиримлилиги билан танилган Каприо «дунёдаги энг меҳрибон судья» деб аталган эди.
Фото: AP
Судда таъсирли чиқишлари билан танилган судья Фрэнк Каприо 88 ёшида ошқозон ости бези саратонидан вафот этди, дейилади унинг Facebook саҳифасидаги баёнотда.
АҚШ Род-Айленд штатидаги Провиденс шаҳридан бўлган судьяни баъзилар «Провиденсда қўлга олинганлар» сериали орқали танийди, унинг лавҳалари ижтимоий тармоқларда, жумладан, Каприонинг 1,6 миллион обуначиси бўлган TikTok платформасида оммалашган.
«Унинг мероси у илҳомлантирган сон-саноқсиз одамларнинг эзгу ишларида яшайди. Унинг шарафига биз дунёга бироз кўпроқ раҳм-шафқат олиб келишга ҳаракат қиламиз - худди у ҳар куни қилганидек», дейилади баёнотда.
Одамлар Каприони суд залидаги раҳмдиллиги ва кечиримлилиги учун «дунёдаги энг меҳрибон судья» деб атаган. Сериал 2000 йилда эфирга узатилган ва тўрт марта «Эмми» мукофотига номзод бўлган.
Каприо 1985 йилдан 2023 йилгача Провиденс муниципал судининг судьяси бўлиб ишлаган. 2023 йил декабрь ойида, 87 ёшга тўлганидан кўп ўтмай, Каприо ижтимоий тармоқларда саратон касаллигига чалинганини айтиб, ҳиссий видеони жойлаштирган эди.
Ушбу судья Америкадаги ўзбекистонлик талабани ҳам сўроқ қилган ва унинг жаримасини камайтитиб берган эди.
