«Фенербаҳче» Жозе Моуриниони ишдан бўшатди

Туркиянинг «Фенербаҳче» клуби матбуот хизмати жамоа бош мураббийи лавозимини эгаллаб турган Жозе Моуринио билан хайрлашганини маълум қилди.

Фото: Reuters

27 август, чоршанба куни «Фенербаҳче» Чемпионлар лигаси плей-офф босқичида «Бенфика»га имкониятни бой бериб, турнирдаги иштирокини якунлади.

«2024-2025 йилги мавсумдан буён бош мураббийимиз бўлиб келаётган Жозе Моуринио билан хайрлашишга қарор қилдик. Клуб унга жамоамиз ривожига қўшган ҳиссаси учун миннатдорчилик билдиради ва келажакдаги фаолиятида муваффақиятлар тилайди», — дейилади "Фенербаҳче" матбуот хизмати X ижтимоий тармоғида эълон қилинган баёнотда.

Моуринио аввалроқ «Реал», «Челси», «Интер», «Тоттенҳэм», «Рома» каби клубларда ишлаган.