10 сентябрь куни Полша бош вазири Доналд Туск операциялар давом этаётганини ва НАТО бош котиби Марк Рутте билан «доимий алоқада» эканини айтди. Ҳукумат вакилининг маълум қилишича, Туск вазирлар кенгашининг фавқулодда йиғилишини соат 8:00 да чақирган.
Reutersʼнинг ёзишича, Полша ҳарбий қўмондонлиги Россия ҳужуми вақтида дронлар бир неча бор Полша ҳаво ҳудудини бузганини билдирди. Радарларда 10 дан ортиқ объект кузатилган ва хавф туғдириши мумкин бўлганлари «нейтраллаштирилган».
«Ҳудудимизга кирган айрим дронлар уриб туширилди. Уларнинг ҳалокат жойларини аниқлаш бўйича қидирув ишлари давом этмоқда», дейилади баёнотда.
Ҳарбийлар одамларни уйда қолишга чақириб, Подласкиэ, Мазоветске ва Люблин вилоятлари энг хавф остида эканини таъкидлади. «Бу — фуқароларимиз хавфсизлигига реал таҳдид солган тажовуз ҳаракати», дейилади расмий огоҳлантиришда.
Россия Мудофаа вазирлиги ҳозирча вазиятга муносабат билдирмади.
CNN нашрининг ёзишича, АҚШ давлат котиби Марко Рубио ҳам бу ҳақида хабардор қилинган. Лекин Давлат департаменти изоҳ бермади.
Варшавадаги энг йирик аэропорт — Чопин аэропорти ҳарбий ҳаракатлар туфайли ҳаво ҳудуди ёпилганини билдирди. Flightradar24 маълумотларига кўра, Чопинга қўниши керак бўлган бир қанча рейслар бошқа аэропортларга йўналтирилган.
АҚШ Федерал авиация маъмурияти олдинроқ Чопин аэропорти Полшанинг вақтинча ёпилган тўртта аэропортидан бири эканини, улар орасида Украинага йўловчи ва қурол ташишда муҳим бўлган Ржешув–Ясионка аэропорти ҳам борлигини маълум қилган эди.
Украинанинг ҳаво кучлари маълумотига кўра, Волин ва Лвов вилоятлари ҳам жумладан, мамлакатнинг катта қисми бутун тун ҳаво ҳужуми огоҳлантиришлари остида бўлган. Аввалроқ Украина ҳаво кучлари Россия дронлари НАТО аъзоси Полша ҳаво ҳудудига кириб, Замош шаҳрига таҳдид солганини билдирганди. Бироқ кейинроқ бу баёнотни Telegramʼдан олиб ташлаган.
