Суриштирув: Германияда қидирувда бўлган Марсалек Москвада яшаяпти

Немис адлиясидан яширинган Wirecard молиявий компаниясининг собиқ бош директори Ян Марсалек Москвада яшаяпти, Россия ФСБ билан ҳамкорлик қиляпти ва Россия Федерацияси томонидан босиб олинган Украина ҳудудларига мунтазам ташриф буюряпти. Бу ҳақда The Insider ва Der Spiegel нашрларининг 16 сентябр, сешанба куни чоп этилган қўшма суриштирувида айтилади.

Журналистларнинг таъкидлашича, Марсалек дунё миқёсида қидирилаётган жиноятчилардан бири бўлиб, «деярли яширинмаган ҳолда» Москва марказида сайр қилиб юради. Чоп этилган фотосуратлардан бирида Wirecard бошқарув кенгашининг собиқ аъзоси гўёки Россия ФСБнинг 41 ёшли ходими Татяна Спиридонова билан бирга юрган. Марсалек у билан камида 2021 йилдан бери муносабатда бўлган, дейилади қўшимча маълумотларда.

«Спиридонова Марсалекнинг кўплаб операцияларидан хабардор бўлган ва ҳатто уларда қатнашган. Масалан, 2022 йилнинг июн ойида Марсалек ўзи Венада яратган жосуслик тармоғи ёрдамида бир гуруҳ австриялик сиёсатчилар ва хавфсизлик амалдорларини кузатган», деб ёзади журналистлар.