DW хабарига кўра, реестрда ЮКОСнинг собиқ раҳбари Михаил Ходорковский, сиёсатшунос Екатерина Шулман ва тадбиркор Евгений Чичваркиндан ташқари, ҳомий Борис Зимин, мухолифатчи сиёсатчи Владимир Милов, адвокат Марк Фейгин, сиёсатчи Леонид Гозман ҳамда журналист Майкл Наки бор.
Шунингдек, ҳуқуқ ҳимоячиси Анастасия Буракова, собиқ муниципал депутат Елена Котёночкина, «Очиқ Россия» ҳаракатининг собиқ фаоли Анастасия Шевченко ва Алексей Нестеренко ҳам рўйхатга киритилган.
Реестрда уларнинг туғилган санаси ва жойи, солиқ тўловчи рақами, шахсий суғурта ҳисоб рақами ҳамда чеклов қўллаш асослари кўрсатилган.
«Вақтинчалик чеклов чоралари» қаторига, жумладан, қуйидагилар киради:
— Россия ичида давлат хизматлари ва хорижда консуллик хизматларини кўрсатишни рад этиш, шу жумладан, хорижга чиқиш паспорти ёки ишончнома расмийлаштирмаслик;
— кредит ва қарз бермаслик;
— кўчмас мулк ёки транспорт воситаларига бўлган ҳуқуқларни рўйхатдан ўтказишни тақиқлаш;
— якка тартибдаги тадбиркор ёки ўзини ўзи банд қилган шахс сифатида рўйхатдан ўтишни тақиқлаш;
— банк ҳисобларини блоклаш ва банк иловаларидан фойдаланиш имкониятини чеклаш.
Хабарда қайд этилишича, чоралар хорижга кетган, маъмурий иш бўйича жавобгарликка тортилган ёки Жиноят кодексининг моддалари бўйича судланган Россия фуқароларига қаратилган. Улар орасида Россия армиясини «обрўсизлантириш», «хорижий агентлар» тўғрисидаги қонунчиликни бузиш, «номақбул ташкилот» фаолиятида иштирок этиш ва мамлакат ҳудудий яхлитлигини бузишга очиқ чақириқлар билан боғлиқ ишлар ҳам бор.
Тегишли қонун лойиҳалари Давлат думасида 2025 йил декабрида биринчи ўқишда, 2026 йил июлида эса иккинчи ва учинчи ўқишларда қабул қилинган. Августда уларни президент имзолаган.
«Первый отдел» ҳуқуқ ҳимояси ташкилоти бу чораларни эмиграциядаги россияликларни амалда фуқаролик ҳуқуқларидан маҳрум қилишга тенглаштирган. «Медуза» нашри эса реестрга киритилиш оқибатларини амалда «фуқаролик ўлими» деб баҳолаган.
