“Lixiang L9 учун 67 минг доллар тўлагандим” — “Premier Motors” фуқароларни чув туширди

Тошкент шаҳридаги “Premier Motors Auto” МЧЖ вакилларига нисбатан жиноят иши қўзғатилди. Тергов ҳужжатларига кўра, улар машина олиб бериш ваъдаси билан фуқароларни алдаб келишган. Жабрланувчилар тергов жараёнларидан норози эканликларини, расмий идораларга қилинган мурожаатларидан наф чиқмаётганини айтмоқда.

{Yii::t(}

Ўтказиб юбориш 6s

Ўтказиб юбориш

Бир гуруҳ фуқаролар Kun.uz’га мурожаат қилиб, Тошкент шаҳридаги “Premier Motors Auto” МЧЖ фаолиятидан норози эканликларини билдирди. Уларнинг таъкидлашича, автосалон вакиллари машина олиб бериш ваъдаси билан алдашган. Бироқ ойлар ўтганига қарамай на машина олиб беришган, на тўлов пулини қайтаришган.

Жабрланувчилардан бири Equinox олиш мақсадида автосалонга 235 млн сўм тўлаганини, бироқ 9 ойдан бери турли ваъдалар билан алдаб келишаётганини таъкидлади.

“Машина қачон келади, дея сўрасак, ҳар сафар эртага, индинга, обеддан кейин чиқади, деб алдайверди. Автосалондаги ходимлар ҳам машинангиз келяпти, деб бизни алдашди. 9 ойдан бери ишимиз ҳал бўлмаяпти”, дейди фуқаро Равшан Ҳасанов.

Kun.uz танишган айблов хулосасида келтирилишича, Равшан Ҳасанов Яккасарой тумани, Қушбеги даҳасида жойлашган “Premier Motors” автосалонига машина харид қилиш мақсадида борган. “Premier Motors Auto” МЧЖ менежери Д.И. Равшан Ҳасанов билан учрашган ҳамда унга ўзини ушбу автосалон раҳбари сифатида таништирган. Сўнгра 235 млн сўм эвазига Equinox машинасини қисқа муддатда олиб келиб беришини ваъда қилган. Унга ишонган Равшан Ҳасанов ушбу миқдордаги пулни тўлаган. У ва “Premier Motors Avto” МЧЖ директори Ш.Р. ўртасида 2024 йил 13 декабр куни “Консалтинг хизматлар кўрсатиш юзасидан” 8-сонли шартнома тузилган. Бироқ ўтказилган судга оид хатшунослик экспертизаси шартномадаги МЧЖ раҳбарининг имзоси қалбакилаштирилгани, уни Д.И. қўйгани ҳақида хулоса берган.

Жабрланганларнинг айтишича, алданиб қолганларнинг аксарияти Instagram ижтимоий тармоғида кўрсатилган рекламага ишониб тўлов қилган. Улар орасида 67 минг, 35 минг, 10 200 доллар, 235 млн сўм тўлов қилган фуқаролар бор.

“Premier Motors”да ишлайдиган Д.И.ни анчадан бери танирдим. Унга Cobalt машинаси кераклигини айтдим. У менга икки кундан кейин алоқага чиқиб, Cobalt борлигини ҳамда бир ҳафта муддатда машинани чиқариб беришини айтганди. Шунга ишониб мен ҳам Cobalt машинасига 10 200 доллар пул бердим. Автосалонга бориб тўлов қилмаганман, Д.И.нинг қўлига берганман. У уйимга келиб пулни олиб кетган. Шу билан ана чиқяпти, мана чиқяпти деб вақт чўзилди. Ҳалигача машинани олганим йўқ”, дейди фуқаро Валихон Аъзамов.

Яна бир жабрланувчи Саидикром Саидумаров эса Lixiang L9 машинасини харид қилиш ниятида автосалонга бориб, алданган.

“2024 йил декабр ойида Қушбегидаги “Premier Motors” автосалонига машина олиш мақсадида борганмиз. Ўша ерда бир қиз кутиб олган. Lixiang L9 машинасига 67 минг доллар тўлов қилганман. Ўша пайтда бу машина 70 минг доллар эди. “Premier Motors”даги қиз билан гаплашганимда у машина нархи 67 минг доллар эканини айтиб, алдаб бизни чақириб олган. Бошқа жойдан 2-3 минг доллар арзон экан, деб қизиқиб борганмиз-да. Кейин билсак Д.И. машенник бола экан” дейди у.

Аввалроқ “Premier Motors Auto” МЧЖ таъсисчиларидан бири, менежери ва ишчилари фирибгарликда гумонланаётгани, хусусан, автосалон менежери 20 га яқин ҳолатда машина олиб бериш ёки сотиб олиш ваъдаси билан фуқароларни алдагани ҳамда тўланган миллиардлаб сўм пулларни ўз эҳтиёжига ишлатиб юборгани хабар қилинганди. Умумий ҳисобда ўзлаштирилган маблағ 7 млрд сўмдан ортиқ.

Жиноят ишининг “Premier Motors Auto” МЧЖ таъсисчиларидан бири Ш.Р. ва жамиятнинг бир нечта ишчиларига оид қисми ажратилиб, алоҳида иш юритувига олинган.