Полша Беларус билан чегарасини қайта очди

25 сентябр, пайшанбага ўтар кечаси Полша «Запад-2025» Россия-Беларус ҳарбий машғулотлари туфайли тахминан икки ҳафта давомида ёпилган Беларус билан чегара пунктларини қайта очди.

Беларус вақти билан соат 01:00 да ҳаракат қайта очилди. Тереспол-Брест чегара пункти (автомобиллар учун), Кукурики-Козловичи чегара пункти (юк автомобиллари учун) ва учта темирйўл ўтиш жойлари қайта очилди. Бироқ, бошқа чегара пунктлари ёпиқлигича қолмоқда.

Беларуснинг Onliner нашри Telegramʼда соат 01:20 да чегарани кесиб ўтган биринчи транспорт воситаси аниқлангани ҳақида хабар берди. «Мана, Полша томонидан кириб келган биринчи автомобил. Қизиғи шундаки, унда Полша рақамлари бор», — дейилади хабарда. Бу «ҳеч бўлмаганда Брест-Тереспол йўл кесишмасида» чегаранинг қайта очилишини тасдиқлади.

Полша бир томонлама тартибда Беларус билан чегарасини 12 сентябрга ўтар кечаси бутунлай ёпиб қўйди. Уч кун аввал бу қарорни эълон қилар экан, Полша бош вазири Доналд Туск буни Беларус ҳудудида 12 сентябрдан 16 сентябрга қадар «ҳарбий доктрина нуқтаи назаридан жуда агрессив» «Запад-2025» манёврлари ўтказилиши билан боғлади.