АҚШ президенти Доналд Трамп мамлакатнинг ғарбий соҳилидаги йирик Портленд шаҳрига, шунингдек, Иммиграция ва божхона назорати хизмати (ICE) объектларига қўшин юборишга буйруқ берди.
«Ички хавфсизлик вазири Кристи Ноэмнинг илтимосига кўра, мен уруш вазири Пит Ҳегсетга Антифа ва бошқа ички террорчилар томонидан қамал қилинган, урушдан азият чекаётган Портленд ва ICE объектларини ҳимоя қилиш учун барча зарур қўшинларни юборишга топшириқ бераман», – деб ёзган Трамп Truth Social платформасида.
«Мен, шунингдек, агар керак бўлса, тўлиқ куч ишлатишга рухсат бераман», – дея қўшимча қилган Трамп. У қўшинлар нима билан қуролланишига аниқлик киритмади.
Портленд АҚШ ҳудудида Лос-Анжелес, Вашингтон ва Мемфисдан кейин президент қўшин юборган тўртинчи шаҳар бўлади.
«Портлендда миллий хавфсизликка таҳдид йўқ. Одамлар хавфсизликда ва тинч», – деган Орегон штати губернатори Тина Котек.
Шанба кунги матбуот анжуманида Котек «қўшинларнинг ҳар қандай шаклдаги жойлаштирилиши ҳокимиятни суиистеъмол қилиш сифатида қабул қилиниши» ва «қандайдир жавоб чоралари қўллаш-қўлламасликни ҳал қилиш» учун ўз ҳаракатларини Орегон бош прокурори Дэн Рейфилд билан мувофиқлаштираётганини айтди.
«Агар зарурат бўлса, биз реакция қилишга тайёр турамиз», – дея қўшимча қилган Котек.
Портленд шаҳри мэри, Демократик партия вакили ҳисобланган Кит Уилсон ҳам Трампнинг ўз шаҳрига қўшин киритиш бўйича қарорига қарши чиққанди.
«Мен федерал ҳукуматдан аралашишни сўрамадим, бунга зарурат йўқ», – деган у.
Портлендда бир неча ойдан буён ICE’нинг маҳаллий идораси атрофида Трамп маъмуриятининг ноқонуний муҳожирларга қарши чораларни кучайтириш бўйича ҳаракатларидан норозилик намойишлари бўлиб ўтмоқда.
Трампнинг постида бу шаҳарга Миллий гвардия ёки АҚШнинг мунтазам қуролли кучларидан қайси бирини жалб этиш режалаштираётганига, шунингдек, «тўлиқ куч» деганда нима назарда тутилганига аниқлик киритилмаган.
Трампнинг шанба кунги баёноти Техасдаги ICE иммиграция хизмати объектида содир бўлган отишмада икки киши ҳалок бўлгани ва бир киши оғир тан жароҳат олганидан бир неча кун ўтиб эълон қилинди.
АҚШдаги йирик шаҳарлар аҳолиси (ҳатто Техас ёки Флорида каби «қизил» штатларда ҳам) демократлар учун овоз беради. Кўпинча демократлар шаҳар маъмуриятларини ҳам назорат қилади.
