Ўзимиз билан гаплашишимиз ақлдан озиш ёки ёлғизлик белгиси эмас, аксинча, бир қатор когнитив ва ўз-ўзини тартибга солиш функцияларини бажариши мумкин, деб хабар берди Blikk.
Нашрнинг тушунтиришича, бу одат вазифани бажариш босқичларини тартибга солишга, диққатни жамлашга ёки нима қилмоқчи эканимизни ўзимизга эслатиб туришга ёрдам беради.
Қайд этилишича, вазифаларни овоз чиқариб айтиш ўзига хос йўналтирувчи вазифасини ўташи мумкин. Масалан, агар бирор киши уйни йиғиштираётганда яна нималар қилиш кераклигини бирма-бир санаб турса, унга ҳаракатлар кетма-кетлигига риоя қилиш осонлашади ва кейинги қадамни унутиб қўйиш эҳтимоли камаяди.
Тадқиқотларга кўра, бу одат муайян вазифаларни бажаришда когнитив қобилиятларни ҳам яхшилаши мумкин.
Бироқ бу ҳали ҳаммаси эмас, чунки ўзи билан суҳбатлашиш ҳиссиётларни тартибга солишда ҳам муҳим рол ўйнаши мумкин.
Ўз-ўзига гапиришга бағишланган тадқиқотларга кўра, тўғри танланган сўзлар, масалан, ижобий ёки руҳлантирувчи сўзлар иш самарадорлигини ошириши ва ҳатто стрессли вазиятларни енгиб ўтишга ёрдам бериши мумкин.
Шундай қилиб, уй юмушларини бажариш пайтида овоз чиқариб ўйлаш ғалати одат эмас, балки ўз-ўзини тартибга солиш ва вазифаларни ташкиллаштиришнинг кундалик шаклларидан биридир.
