Қўшимча функционаллар
-
Тунги кўриниш
Кремл ЕИнинг Россия музлатилган активларидан фойдаланиш режасига жавоб қайтарди
Россия президентининг матбуот котиби Дмитрий Песков Киевга ёрдам бериш учун Россиянинг музлатилган активларидан фойдаланганлар «таъқибга қилинади» деди.
Фото: The Kremlin/TheKremlinMoscow-SvenSimon/picture alliance
Кремл Европа комиссиясининг Украинани музлатилган Россия активлари ҳисобидан молиялаштириш бўйича режаларига изоҳ берди. Бу ҳақда 1 октябр, чоршанба куни Россия президенти матбуот котиби Дмитрий Песков баёнот билан чиқди.
«Гап Россия мулкини ноқонуний равишда тортиб олиш ёки русча айтганда, ўғрилик режалари ҳақида кетмоқда», — деди Песков.
Агар кимдир «бизнинг активларимизни» «ноқонуний равишда ўзлаштирмоқчи» ёки улардан «дивидендлар олиш»ни истаса, «бу ёки бошқа тарзда бунга алоқадор бўлганлар жиноий таъқиб қилинади», дея унинг сўзларидан иқтибос келтирган «Интерфакс».
Кремл матбуот котиби «нафақат шахслар, балки давлатлар» ҳам жавобгарликка тортилишини айтди. «Бу, албатта, жавобсиз қолиши мумкин эмас», — дея қўшимча қилди Песков.
Аввалроқ, 1 октябр куни Еврокомиссия (ЕК) раиси Урсула фон дер Ляйен Киевга Россиянинг музлатилган активлари гарови остида миллиардлаб евро кредитлар ажратиш ташаббусини қўллаб-қувватлашга чақирган эди.
