Яқин вақт ичида кузатиш керак бўлган топ-11 янги стартап

Дастур венчур фондлар ва экспертлар олдида лойиҳаларнинг очиқ тақдимоти билан якунланди. Жамоалар учун бу таклиф олиш ва салоҳиятли инвесторлар олдида ўзини кўрсатиш, томошабинлар учун эса бугунги кунда ўзбек стартап муҳитида қандай ғоялар муҳокама қилинаётганини кўриш имкониятини берди.

Kun.uz Business ушбу тадбирни кузатиб борди. Қуйида тадбир ҳақида ҳикоя қилмоқчимиз: эртага бизнесга айланиши мумкин бўлган илк ғоялар айнан шу ерда пайдо бўлади. Саҳнада тақдим этилган лойиҳалар билан танишинг.

AISHA AI — бизнес учун рақамли ёрдамчи

Асосчилар: Элзодхон Шарафаддинов, Алишер Тожиев

Ғоя: компаниялар учун “ақлли ёрдамчи” ишлаб чиқадиган лойиҳа. Ғоя – оддий бизнес вазифаларни турли соҳаларда қўлланиладиган рақамли ечимлар ёрдамида автоматлаштириш. Маҳсулотларимиз: Call metrics, Voice agent ва Chatbot компанияларга мижозлар билан самарали ишлаш, ички жараёнларни кучайтириш ва ходимларга юкламаларни пасайтиришга ёрдам беради. ChatGPT каби халқаро сервислар мавжуд, лекин улар кўпинча маҳаллий бозор хусусиятларини ҳисобга олмайди ва Ўзбекистондаги бизнес жараёнларга интеграция қилинмаган. AISHA AI айнан мана шу бўшлиқни тўлдиришни мақсад қилган.

Қандай ишлайди: тизим компаниялар маълумотларига уланади ва бир нечта функцияларни бажаради:

Call metrics – қўнғироқлар таҳлили, статистика тузиш, хизмат сифатини баҳолаш;

Voice agent – мижозлар қўнғироқларига автоматик жавоб бериш, зарур маълумотларни тақдим этиш ёки зарурат бўлганида операторга улаш;

Чат-бот – чатда мижозларнинг тез-тез бериладиган саволларига жавоб бериш, ҳужжатларни (шартномалар, ҳисоб-фактуралар, хатлар) автоматик тарзда тайёрлаш, ходимларга керакли файл ва ҳисоботларни топишда ёрдам беради.

Босқич: айни пайтда AISHA AI прототипи компанияларда синовдан ўтказилмоқда.

Сайт: https://aisha.group/uz

Aixposure —ChatGPT’да кўриниб туриш

Асосчилар: Нуржаҳон Қандаҳоров, Равшан Жуманазаров, Миркамол Илҳомов

Ғоя: борган сари кўплаб одамлар ахборотни Google эмас, ChatGPT ёки Gemini орқали излашмоқда. Аммо компаниялар бу янги қидирув тизимларига қандай киришни ҳозирча тушунгани йўқ. Aixposure кичик ва ўрта бизнесга сунъий интеллект жавобларида тилга олинишга ёрдам берадиган сервисни ишлаб чиқмоқда.

Қандай ишлайди: тадбиркор ўз сайтини платформага улайди. Сервис компания номи ChatGPT ёки бошқа сунъий интеллект платформаларида тилга олинишини текширади. Агарда маълумот йўқ бўлса ёки тўлиқ бўлмаса, тизим нималарни тўғрилаш кераклигини кўрсатади: маълумотлар қўшиш, таърифни тизимлаш, фактларни янгилаш, техник хатоларни тўғрилаш. Обуна — ойига $29.

Босқич: MVP ва дастлабки синовчи мижозлар. Стартап учун $100 минг сўралмоқда.

Сайт: https://aixposure.ai/

Изоҳ: Aixposure кофаундери Нуржаҳон 1 ойлик ўқиш давомида энг юқори натижани кўрсатди, унинг дастурдаги биринчи ва энг охирги питчлари бир-биридан кескин фарқ қилади, устоз сифатида бу мени жуда хурсанд қилди. Лойиҳанинг ўзи дижитал-маркетинг учун ҳаводек зарур, зеро фойдаланувчиларнинг одатлари ўзгариб туради, хизмат/маҳсулотларга сўровлар борган сари ChatGPT ва бошқа GPT моделлар орқали берилмоқда. Лойиҳа бизнесга LLM моделларда кўриниб туриш имконини беради. (Азизбек Қурбонов)

1Way — йўловчилар билан сафарлар

Асосчи: Жасур Холматов

Ғоя: Тошкентда кўпчилик шахсий машинасида ишга боради ва уларнинг ўриндиқлари кўпинча бўш бўлади. Шу билан бирга одамлар таксиларга пул сарфлашади. 1Way уларни бирлаштиришни таклиф қилади: йўловчи ўзи билан йўли бир бўлган ҳайдовчининг машинасига ўтиради.

Қандай ишлайди: ҳайдовчи иловада йўналишини кўрсатади, йўловчи ўзи кетадиган йўналишдаги машинани топади. Тўлов платформа орқали ўтади. Бу йўловчи учун таксига нисбатан арзонроққа тушади, ҳайдовчига эса ёнилғи харажатини қоплашга ёрдам бўлади.

Босқич: 8 мингга яқин сафар синовдан ўтказилди, база – 3 минг ҳайдовчи ва 8 минг йўловчи. $100 минг инвестиция жалб этиш режалаштирилмоқда.

Сайт: https://1Way.uz

Изоҳ: Аксарият агрегаторлар “садоқатли” ҳайдовчиларни, яъни асосий иши таксичилик бўлганларни маъқул кўради. Лекин эътибордан четда қолаётган, ўз ишини бажариш асносида йўловчи ташиши мумкин бўлган инсонлар бор. Бозор жуда катта ва фаундерга омад тилайман. Бозор ҳаракатланишни талаб қилади, шунинг учун Жасур уни тезроқ эгаллаши керак бўлади.

Genix — чат орқали корпоратив тизим

Асосчилар: Толиб Раҳмонов, Наврўзбек Норалиев

Ғоя: йирик компаниялар ҳисоб-китоб ва бошқарув учун тизимлардан (ERP) фойдаланади. Одатда уларни созлаш қиммат туради ва бир неча ой вақтни олади. Genix бундай тизимни соддалаштирмоқчи: уни чатда таърифлаш, сунъий интеллект эса керакли функцияларни созлаши учун.

Қандай ишлайди: раҳбар «бизда омбор ва учта филиал бор, ҳудудлар бўйича савдоларни кўриш керак» деб ёзади. Тизим модулларни танлайди ва ҳисобот тузади. Буёғига ходимлар ҳам дастур билан чат орқали суҳбатлашади: «бир ойлик даромадни кўрсат» ёки «келишув жараёнини ўзгартир».

Босқич: прототип ва пилоти маҳаллий компанияларда. Стартап ривожланиш учун $200 минг изламоқда.

Изоҳ: Genix сунъий интеллект барча соҳаларга кириб келаётгани ва барча қарорлар чатлар фойдасига ўзгараётганини яққол намунасидир. 1C даврида маълум бир жадвални тузиш учун 10та ҳаракатни бажариш керак эди, ҳозир эса нима ва қандай шаклда кераклигини ёзиш кифоя. Ва, тайёр натижа қўлингизда бўлади.

Толибни (фаундер) анчадан бери биламан, ўша пайтларда у бошқа лойиҳа устида ишларди. Толиб ўз лойиҳасини питч қилиши 30 кунда аниқ бўлди. (Азизбек Қурбонов)

SAPI — креаторлар учун платформа

Асосчи: Соҳибжамол Худайбергенова

Ғоя: Ўзбекистонда блогер ва муаллифлар ўз контентини монетизация қилиши қийин. Patreon ёки Boosty каби платформалар 30% гача комиссия олади, тўловни эса ҳафталаб кутишга тўғри келади. SAPI креаторлар ўз обуначиларидан тўловни тезда олиши мумкин бўлган маҳаллий платформани тақдим этмоқчи.

Қандай ишлайди: муаллиф иловада рўйхатдан ўтади, Multibank’да ҳисобрақамини улайди, ўзини ўзи банд қилган мақомини олади. Кейин эса контентни юклаши ва аудиториядан обуна ёки донат кўринишида қўллов олиши мумкин. Тўловлар бир дақиқада тушади, комиссия — 10% (рақобатчиларда 20–30%).

Босқич: умумий аудиторияси 1 млндан ортиқ бўлган 50 муаллиф жалб этилди. Ҳамкорлар — Multibank ва MOC Hub.

Молия: жамоа биринчи йил учувн $150 минг доллар изламоқда.

Изоҳ: SAPI креатив бозор учун керак, ҳозирда креаторлар фақат реклама орқали пул ишламоқда ва буни ўзгартириш вақти келди.

Соҳибжамол курс давомида питчинг бўйича муҳим билимларга эга бўлди ва энг муҳими, ҳамжамиятнинг бир қисмига айланди. Курс фаундерларга ўзлари каби фаундерлардан иборат “экспертлар кенгаши”га киришга йўл очди, бу ўз навбатида уларга фидбеклар олиш ва ҳамжамият билан биргаликда ўсиш имкониятини беради. (Азизбек Қурбонов)

Mulk Protocol — рақамли кўринишдаги исломий молия

Асосчи: Ҳаётжон Азимов

Ғоя: исломий облигациялар (суқуқ) жуда узоқ ва қиммат чиқарилади. Mulk Protocol уларни рақамли шаклга – блокчейнга ўтказишни таклиф қилади. Компаниялар бу билан облигацияларини тезроқ чиқариши, инвесторлар эса кичик улушларни ҳам онлайн сотиб олишлари мумкин бўлади.

Қандай ишлайди: эмитент шариатга мувофиқлик бўйича текширувдан ўтади, сўнгра актив билан (масалан, кўчмас мулк) таъминланган рақамли токенларини чиқаради. Инвестор токенни сотиб олади, тўловлар ва сўндириш смарт-шартномалар орқали автоматик равишда амалга ошади.

Босқич: бета-версия, пилот лойиҳалар ўтказилди. Ҳамкор ва инвесторлар изланмоқда.

Сайт: https://Mulkprotocol.io

Изоҳ: Mulk Protocol алоҳида эътиборга лойиқ, асосчилар ўз соҳаларида 15 йилдан ортиқ тажрибага эга. Маҳсулоти бўлмай туриб йирик шартномалар учун юмшоқ коммитментлар олишган.

Лойиҳа ҳар қандай объектни (самолёт, отель, завод ва бошқалар) токенлаштириш ва инвестиция жалб этиш, объектларни фуқаролик ҳуқуқлари мавжуд мамлакатларда исломий молия қоидалари бўйича сотиш имконини беради.

Сессияларга қатнашгунига қадар Ҳаётжон тажрибага эга эди, аммо ишловчи фреймворклар орқали у ўз маҳоратини сайқаллади.

Smart Menu —QR-код орқали буюртмалар ва изоҳлар

Асосчилар: Аброрбек Тошпўлатов, Отабек Душамов

Ғоя: ресторанлар кўпинча секин хизмат кўрсатиши ва қайта алоқа йўқлиги сабабли мижозларини йўқотишади. Smart Menu барчасини: меню, буюртмалар, тўлов ва изоҳларни бир сервисда бирлаштиришни таклиф қилади.

Қандай ишлайди: мижоз столдаги QR-кодни сканерлайди, телефонида менюни очади ва буюртма беради. Онлайн тўлов қилиш ҳам мумкин бўлади. Хизматдан кейин мижоз изоҳ қолдиради, тизим бу изоҳни сақлаб қолади ва таҳлил қилади. Ресторан эгалари ҳисоботларни олишади ва ўз камчиликларини кўришлари мумкин бўлади.

Босқич: 8 ресторан, 3,3 мингга яқин буюртма. Стартап ривожланиши учун $50 минг изламоқда.

Сайт: https://smartmenu.uz

Gulzor — ўсимликлар маркетплейси

Асосчилар: Сабина Сайфуллаева, Перизат Низаматдинова, Муқаддас Мўминова

Ғоя: Ўзбекистондаги аксарият гул дўконлари офлайн ишлайди ва мавсумга боғлиқ. Gulzor дўконлар гулларни онлайн сотиши мумкин бўлган маркетплейсни таклиф қилмоқда.

Қандай ишлайди: сотувчилар гуллар сурати ва нархини жойлайди, харидорлар уларни етказиб бериш билан буюртма қилишади. Режада гулларни парваришлаш сервисини ҳам йўлга қўйиш мавжуд: гулнинг расми жойланади ва тизим унга қандай парвариш лозимлигини айтади. Шунингдек, гулчи ёки боғбонни уйга чақириш ҳам мумкин бўлади.

Босқич: 8та дўкон уланган, дастлабки буюртмалар қилинган. Жамоа акселераторларда қатнашди ва грантлар олди.

Maskan — онлайн мотам хизматлари

Асосчилар: Комронбек Очилов, Муқаддас Ҳусниддинова

Йўлга қўйилиши: 2025

Ғоя: мотам маросимлари кўплаб қўнғироқлар ва югур-югурларни талаб қилади. Funeral Washer барча хизматлар: ғассол, тобут, гўрков, домла хизматларини бир сервис орқали таклиф қилади.

Қандай ишлайди: марҳумнинг қариндошлари сайтда буюртма қолдиради, менежер бажарувчиларни танлайди. Тўлов сервис орқали бўлади.

Босқич: сайт кўринишидаги MVP.

AVEUM — хизматларни дистрибуция қилиш учун финтех-тизим

Асосчи: Тимур Бурҳонов

Йўлга қўйилиши: 2025

Ғоя: Ўзбекистондаги анъанавий молия ва суғурта сервислари оммавий истеъмолчилар учун мураккаб бўлиб қолмоқда. AVEUM уларни оддий pre-paid карта кўринишида осонлаштирморқчи.

Қандай ишлайди: мижоз картани олади ва уни онлайн активлаштиради. У gift card’га ўхшайди, лекин молиявий хизматларга кириш имкони бўлади. Концепция финтех ва чакана дистрибуцияни бирлаштириб, одамларга хизматни аксессуар ёки ваучер сингари осонгина олиш имконини беради.

Босқич: активация учун ИТ-платформа ишлаб чиқилмоқда, ҳамкор компаниялар билан музокара олиб борилмоқда.

Business Robots AI — сотувлар учун чат-ботлар

Асосчилар: Валерий Бушуев, Хожакбар Аҳмаджонов, Амар Фарҳадий

Йўлга қўйилиши: 2024

Ғоя: кичик бизнес рекламага маблағ сарфламоқда, лекин менежерлар мижозларга жавоб беришга улгуришмаяпти. Business Robots AI бу ишни ўз зиммасига оладиган чат-ботларни таклиф этмоқда.

Қандай ишлайди: бот мижозга дарҳол жавоб ёзади, саволларга жавоб беради ва менежер билан учрашув вақтини белгилайди. Барчаси 24/7 режимида ишлайди.

Босқич: дастлабки мижозлар, $4,7 минг атрофида ойлик тушум. Стартап Aloqa Ventures’дан $100 минг олди.

Сайт: https://businessrobots.ai

Азизбек Қурбонов фикри: Питчинг бу натижа эмас, бу доимий равишда ўзи ва лойиҳаси устида ишлашни талаб қиладиган жараён.

Стартап питчи маҳсулот ривожи, бозор ва инвестициялар жалб этиш воқелигига қараб ўзгаради. Фақат битта нарса ўзгармайди, бозорни аниқ тушуниш, асосчиларнинг бэкграунди ва қимматли таклиф ҳар қандай питчнинг асосини ташкил қилади.

IT Park’да ўтказилган Demo Day Ўзбекистондаги стартап-саҳна турли-туман бўлиб бораётганини кўрсатди. Жамоалар ўзларини глобал мавзуларда (AI-қидирув, блокчейн, корпоратив тизимлар) ва кундалик ҳаётдаги ишларда (ресторанлар, гуллар) синаб кўрмоқда.

Ҳозирча барча лойиҳалар дастлабки босқичда. Уларнинг аксарияти учун бу фақат тахминлар текширувидек: талаб бўладими, улар ўз бизнес-моделини топа оладими? Лекин экотизим айнан мана шундай қадамлар орқали шаклланади.

2025 йилда бу ғоялар улар татбиқ этишга тайёрлиги учун эмас, балки ўзбек стартапларининг ривожланиш йўналишларини кўрсатиб бераётгани учун кузатишга лойиқ.