Россияда телебошловчи Татяна Лазаревага сиртдан чиқарилган ҳукм узайтирилди

Москванинг Пресненский суди Татяна Лазаревани «чет эл агенти» сифатидаги мажбуриятларини бажармаганликда айблади. Унинг умумий жазо муддати аввалги ҳукм билан қўшиб, етти йилгача оширилди.

Фото: РИА Новости

Россияда мамлакатни тарк этган телебошловчи Татяна Лазаревага нисбатан яна бир сиртдан ҳукм чиқарилди. 7 октябр, сешанба куни Москванинг Пресненский суди уни «чет эл агентлиги» бўйича сиртдан чиқарилган ҳукмга қўшимча равишда бир йил-у тўққиз ойга ахлоқ тузатиш ишларига ҳукм қилди, деб ёзади "Медиазона" интернет нашри.

Бундан ташқари, унинг умумий жазо муддати «терроризмни оқлаганлик» учун олдинги судланганлик билан биргаликда олти ойга оширилиб, етти йилга етди. Шунингдек, Лазаревага тўрт йил давомида веб-сайтларни бошқариш тақиқланган. Унинг адвокати Леонид Соловёв телебошловчига қўйилган айбловларни судда «сиёсий мотивга эга» деб атади, чунки унинг ҳаракатларида жиноят таркиби йўқ.

2024 йил ноябр ойи охирида Россия Иккинчи Ғарбий округ ҳарбий суди Татяна Лазаревани «терроризмни оқлаш»да айбдор деб топиб, уни сиртдан олти ярим йилга умумий режимдаги колонияга ҳукм қилди. Ушбу айблов бўйича жиноий иш 2024 йил май ойида очилган ва бир ой ўтгач, Лазарева халқаро қидирувга берилган.

Телебошловчи Украинанинг учувчисиз учоқларининг Россиядаги нишонларга зарбалари ҳақидаги сўзлари туфайли «терроризмни оқлаш»да айбланган. «Бу даҳшатли, лекин мен хурсандман», деди Татяна Лазарева 2023 йил август ойида «И грянул Грэм» YouTube-каналига берган интервюсида. 2024 йил июн ойида Росфинмониторинг уни «террорчилар ва экстремистлар» рўйхатига қўшди.

Испанияда яшовчи Татяна Лазарева бир неча бор Россия ҳукуматини танқид қилган ва Москванинг Украинадаги кенг кўламли урушига очиқчасига қарши чиққан. 2011 йил декабр ойида у Болотная майдонидаги митингда нутқ сўзлади. 2014 йилда бошловчи Россиянинг Украинанинг Қрим яриморолини қўшиб олишига қарши чиқди.