Қўшимча функционаллар
-
Тунги кўриниш
Хориждан янги телефон олиб киришда оворагарчилик бироз камайди
Энди Ўзбекистонга кираётган ёки хорижга чиқиб кетаётган йўловчилар божхона декларациясини мобил илова орқали онлайн топшириши мумкин. SIM-картали қурилмаларнинг IMEI-кодларини битталаб ёзиб ўтирмай, иловада сканерлаб олса бўлади. Бу қулайлик ҳозирча фақат Тошкент халқаро аэропортида бор, 1 ноябрдан барча ўтказиш пунктларида жорий этилади. Божхона қўмитаси иловадан фойдаланиш учун бепул WiFi ҳудудларни ҳам ваъда қилмоқда.
Ўзбекистон Божхона қўмитаси йўловчи божхона декларациясини онлайн тўлдириб, тақдим этиш имкониятини жорий қилди. Бунинг учун мўлжалланган “Yo'lovchi deklaratsiyasi” номли мобил илова ишга туширилди. Иловани Play Market ва App Store'дан юклаб олиш мумкин.
Фуқаро иловага паспорт маълумотларини киритгач, декларациянинг айрим бандлари автоматик тўлдирилади. Шундан кейин фойдаланувчи кириб келаётган ёки чиқиб кетаётган давлатига доир ҳамда олиб ўтаётган валюта қимматликлари ва бошқа товарларга доир маълумотларини киритади.
Иловада SIM-картали қурилмаларнинг 15 та рақамдан иборат IMEI-кодларини қўлда ёзмасдан, сканерлаш орқали киритиш мумкин.
Илова ҳозирча “Тошкент” халқаро аэропортида синов тариқасида ишга туширилган бўлиб, 1 ноябридан бошлаб барча чегара ўтказиш пунктларида тўлиқ жорий этилади.
“Бундан ташқари, қўшимча тарзда чегара божхона постларига инфокиосклар ҳам ўрнатиш ва улар орқали ЙБД юбориш бўйича ҳам ишлар олиб борилмоқда
Чегара божхона постларида жисмоний шахслар томонидан тизимнинг мобил иловасидан фойдаланиш учун бепул интернет (WiFi) ҳудудлар ташкил этилади”, – дейилади Божхона қўмитаси хабарида.
Қайд этилишича, декларацияни онлайн тўлдириш – қоғоз шаклда тўлдирган вақтда учраши мумкин бўлган камчиликлар (декларациянинг дастурга кеч киритилиши, хато киритилиши ёки киритилмай қолиши, декларацияга ўзбошимчалик билан ўзгартириш киритиш каби ҳолатлар)нинг олдини олади.
Маълумот учун, 2025 йил 1 ноябрдан бошлаб ўтказиш пунктлари орқали ҳаракатланаётган йўловчиларга қулайлик яратиш мақсадида йўловчи божхона декларациясининг мобил иловасини амалиётга жорий этиш вазифаси – Ўзбекистон президентининг 2025 йил 25 мартдаги 57-сон фармонида белгиланган эди.
Мавзуга оид
08:40 / 01.12.2025
Курерлик жўнатмалари орқали юборилган 1 кгга яқин “гашиш” фош қилинди
11:09 / 26.11.2025
Ўзбекистонга шахсий эҳтиёж учун товар олиб киришдаги лимитлар қайта кўриб чиқилади
10:49 / 26.11.2025
Экспорт товарлари божхона қийматини расмийлаштириш бўйича алоҳида тартиб жорий этилди
10:29 / 26.11.2025