Ислом цивилизацияси марказига ноёб совғани Россиянинг «Мадина» нашриёт уйи раҳбари Илёс Садурий топширди. Ҳадя этилган китоблар орасида Екатерина II ташаббуси билан 1787 йилда Санкт-Петербургда чоп этилган Қуръон алоҳида ўрин тутади.
Ушбу мусъҳаф илк тўлиқ шаклдаги босма Қуръонлардан бири ҳисобланади. Уни нашр этиш учун махсус ноёб металл шрифт яратилди ва безак устида татар хаттоти Усмон Исмоил ишлади. Дастлабки тиражи 1200 нусха атрофида бўлган.
Нашр ислом матбаачилиги тарихида муҳим воқеа бўлди ва кўп жиҳатдан кейинчалик Россияда ислом адабиёти матбаачилигининг марказига айланган XIX аср Қозон анъаналарини олдиндан белгилаб берди.
