Болгария Будапештга борадиган Путинга ҳаво коридорини очиб беради

Россия илтимосига кўра, Болгария Владимир Путин Будапештга, Доналд Трамп билан Украинадаги урушни тугатиш бўйича музокаралар ўтказиш учун борса, унга ўз ҳудуди устидан учиб ўтишга рухсат беради.

Фото: Getty Images

Болгария ҳукумати Россия президенти Владимир Путин АҚШ президенти Доналд Трамп билан учрашиш учун Будапештга борса, унга ўз ҳудуди узра учиб ўтишга рухсат беришини маълум қилди. Бу ҳақда 20 октябр, душанба куни Болгария миллий радиоси (BNR) Болгария ташқи ишлар вазири Георг Георгиев баёнотига таяниб хабар берди.

«Агар тинчликка эришиш учун саъй-ҳаракатлар қилинаётган бўлса ва бунинг учун учрашув зарурий шарт бўлса, уни барча мумкин бўлган воситалар билан ташкил қилиш энг мантиқий ишдир», деди Георгиев BNR мухбирига.

Бу Болгария Путинга ҳаво йўлаги тақдим этади деганими, дея берилган саволга вазир: «Агар иштирокчилардан бири кела олмаса, учрашув қандай ўтказилади?» - деган савол билан жавоб берди.

16 октябр оқшомида Трамп Россия президенти Владимир Путин билан икки соатлик телефон мулоқоти ўтказди. Суҳбатдан сўнг у Будапештда Путин билан учрашишга рози бўлганини маълум қилди.

Европа Иттифоқининг ташқи ишлар ва хавфсизлик сиёсати бўйича олий вакили Кая Каллас Путиннинг Венгрияга Украинадаги урушни муҳокама қилиш учун келиши мумкинлигини «ёқимсиз» деб атади. «Йўқ, Халқаро жиноий суд (ХЖС) буйруғига дучор бўлган одамнинг Европа давлатига келаётганини кўриш ёқимсиз», деди у. Шу билан бирга, Каллас «бу қандайдир ёрдам берадими, деган савол туғилади», деб қўшимча қилди.