ЕЧЛ 3-туридаги марказий баҳс Мадридда ўтказилди. Чоршанба оқшомида «Сантяго Бернабеу»да «Ювентус» меҳмон бўлди. Ҳаби Алонсо жамоаси олдинги турларда икки ғалабага эришганди, туринликлар эса икки ўйинда ҳам дуранг қайд этганди. Игор Тюдор жамоаси анчадан буён ғалаба нелигини билмаяпти (охиргиси сентябр ойида «Интер» билан ўйинда бўлганди, шундан кейин кетма-кет беш ўйинда дуранг қайд этилди, А Сериянинг охирги ўйинида эса «Комо»дан мағлуб бўлинди).
Мадридликлар ўз уйида муҳим ғалабага эришди ва Тюдорнинг истеъфосини тезлаштиришди. Туринликлар муносиб қаршилик кўрсатди ва 13 бор зарба берди, аммо мадридликлар икки баробар кўпроқ имкониятга эга бўлди, аммо шу куни Ди Грегорио қаҳрамонларча ўйнади ва мезбонлар 28 та зарбадан фақат бир гол уриш билан кифояланди (тўққиз зарба – дарвоза соҳасига тўғри борган). Ғалаба голида асосий ишни Винисиус бажарди, у барча ҳимоячилардан ўтиб зарба берди, устундан қайтган тўпни эса Беллингҳэм бўш дарвозага киритиб юборди.
Туринликлар уч турдан кейин ҳам икки очко билан қолмоқда ва ўтиш босқичига йўлланма олиш ҳам қийинлашди. «Реал» эса қаторасига уч ғалабадан кейин 1/8 финалга тўғридан тўғри йўлланма олиш учун яхши имконият ҳосил қилган.
Қаторасига тўрт мағлубиятдан иборат нохуш серия қайд этаётган «Ливерпул» бош мураббийи Франкфуртдаги ўйин олдидан бошланғич таркибни қайтадан кўриб чиқди ҳамда икки ҳужумчидан иборат схема танлади. Исак ҳамда «Айнтрахт»нинг собиқ форварди Экитике бир вақтда майдонда бўлиши учун Арне Слот Салоҳни қурбон қилди. Ёзда Германия чемпионатидан келган ва «бургутлар»ни рақиб сифатида яхши биладиган Фримпонг ва Вирцга ҳам илк дақиқалардан ўйнаш имконияти берилди. Флорианда мослашиш жараёни қийин кечмоқда, бу ўйинда ҳам ўтказиб юборилган гол айнан Вирц тўп йўқотиши орқали бошланган ҳужумда урилди. Фримпонга эса бу вақтда майдонда эмасди – у 19-дақиқадаёқ жароҳат олди ва ўрнини Брэдлига бўшатиб берди.
Қизиллар 72 йил ичидаги энг ёмон сериясини қайд этиб, бешинчи бор ютқазиши мумкин эди, аммо жамоа вақтида уйғонди. Ўйиндаги бурилиш нуқтаси эса Экитике собиқ жамоаси дарвозасини ишғол этиши бўлди, у қарши ҳужумда катта тезлик олиб, жарима майдонига кирмасдан кучли зарба берди ва ўзига қадрдон трибуналарни тўлдириб ўтирган мезбон мухлислардан узр сўради.
Бўлимнинг қолган қисмида меҳмонлар иккита бурчак зарбасидан иккита гол уришди ва бу билан амалда ўйин тақдири ҳал бўлди. Гакпо ва Собослаи турли қанотлардан узатма берди, голларни эса марказий ҳимоячилар – ван Дейк ва Конате уришди.
«Айнтрахт» – бежиз бундеслиганинг энг кўп гол ўтказаётган жамоаси эмас. Дарвозабонни алмаштириш Дино Топпмеллер жамоасига ёрдам бермади. Иккинчи бўлимда эса Вирц ўз ўйинини топиб олди. Аввалига у олис устун олдида бўш қолдирилган Гакпони голли пас билан таъминлади, кейин эса Собослаини зарба бериш нуқтасига чиқарди.
«Аякс» – асосий босқичнинг энг ёмон жамоаси бўлиб турибди, «Стэмфорд Бриж»даги мағлубият амстердамликлар учун еврокубоклардаги қаторасига олтинчи мағлубият бўлди, бундай ёмон серия жамоа тарихида иккинчи бор кузатилмоқда. Аввалига жамоа яримҳимоячиси Тейлор майдон марказида қўпол подкати учун (17-дақиқадаёқ) VAR аралашуви билан майдондан четлатилди. Белгиланган жарима зарбаси давомида эса Гиу ҳисобни очди.
Кейин Кайседонинг олис масофадан йўллаган зарбасидан кейин рикошет нидерландларнинг 41 ёшли дарвозабони Пасверни иложсиз аҳволда қолдирди.
Шундан кейин Вегҳорст пеналтини аниқ ижро этиб, ўйиндаги интригани жонлантирганди, аммо бўлим охирида мезбонлар икки бор пеналти тепиш ҳуқуқига эга бўлишди ва амалда ўйин тақдири ҳал бўлди. «Челси» шу куни клуб рекордини икки бор янгилади. Аввалига Гиу (19 ёшу 291 кун) клубнинг асосий еврокубокда гол урган энг ёш футболчиси бўлганди, кейин эса Эстевао (18 ёшу 181 кунлик) унинг натижасини янгилади. Иккинчи бўлимда эса 19 ёшли Жорж ҳам гол урди ва лондонликлар ЕЧЛнинг бир ўйинида уч нафар тинэйжер футболчиси гол урган илк жамоага айланди.
«Бавария»да эса ўсмир футболчи гол урди. Гнабрининг жароҳати туфайли асосий таркибга жалб этилган Ленарт Карл бу имкониятдан фойдаланди ва дебют ўйинини гол билан нишонлади. Бу орқали у Мусиалага тегишли бўлган рекордни янгилаб, жамоанинг асосий еврокубокда гол урган энг ёш футболчисига (17 ёшу 142 кунлик) айланди. Кейин эса Кейн жорий мавсумдаги 23-голини урди, бўлим давомида Диас ҳисобни тенглаштирди, иккинчи бўлимда захирадан майдонга тушган Жексон ҳам ўз номини таблога ёздириб қўйиб, якуний натижани ўрнатди. Шу куни «Брюгге»да ҳеч қандай имконият йўқ эди, мавсум бошидан буён ҳеч қайси турнирда ютқазмаётган «Бавария» турнир ғолиблиги учун асосий фаворитлардан бири эканини намойиш этди.
«Монако»нинг омади келмади: мезбонлар барча кўрсаткичлар бўйича «Тоттенҳэм»дан устун келишди, кутилган голлар бўйича камида икки голга лойиқ ўйин кўрсатишди, дарвоза томон 23 бор зарба берилди, шундан 8 таси дарвоза соҳасига тўғри борди, аммо якунда бир очко билан кифояланишди. Меҳмонлар дарвозабони Гулелмо Викарио шу куни навбатдаги бенефисини ўтказди – у 2,68 голнинг олдини олди (xG модели бўйича).
Норвеглар ултрапрессинг билан қисқа паслар орқали ўйнашга ҳаракат қилишди, аммо таркибдаги футболчилар «Барселона»нинг энг яхши дарвларидаги футболчилари даражасида эмасди ва «Галатасарой»дан учта гол қабул қилиб олишди. Осимҳен Леминнинг узатмасидан кейин тўпни дарвоза бурчагига аниқ йўллаганида ўйин бошланганига эндигина 2 дақиқаю 53 сония ўтганди, бу турклар жамоасининг ЕЧЛдаги энг тезкор голига айланди. Нигериялик ҳужумчи биринчи бўлим давомида дублни расмийлаштирди ва амалда ўйин тақдирини ҳал қилди.
Бир неча кун олдин Франция чемпионати турнир жадвали пешқадами бўлиб олган «Марсел» Лиссабондаги ўйинни мезбон жамоа каби бошлади. Игор Пайшаонинг ўйин стартида Обамеянгнинг узатмасидан кейин олис «тўққизлик»ни аниқ нишонга олиши провансалликлар учун ЕЧЛдаги 100-гол бўлди. Аммо бўлим охирида Эмерсон жамоадошларини қийин аҳволда қолдирди, бош ҳакам аввалига унинг рақиб жарима майдонида йиқилишига алданиб, пеналти белгилаганди. Аммо вазиятга VAR аралашди, монитор қаршисига бориб келган арбитр эса ҳимоячига симуляция учун иккинчи сариқ карточкани кўрсатди.
Иккинчи бўлимда «Спортинг» тўлиқ куч билан олдинга ўтди ва ғалабани илиб кетди. Аввалига захирадан тушган Катамо жарима майдони марказидан зарба бериб, тўпни бурчакка жойлади, ўйин охирларига бориб Алиссон Сантос ғалаба голини урди, унинг зарбасидан кейин тўп Паварга теккан ҳолда йўналишини ўзгартирди ва дарвозабон иложсиз ҳолатда қолди.
«Аталанта» ва «Славия» ўйини куннинг энг кўп зарба берилган ўйинларидан бири бўлди, икки жамоа жами 37 та уринишни амалга оширди. Аммо бу ўйинда ҳам дарвозабонлар энг яхши футболчилар бўлди. Натижа билан тугаган ягона ҳаракат – тўп учун кураш вақтида Де Кетеларенинг футболкаси йиртилиб кетиши бўлди. New Balance ўзи ишлаб чиқараётган формалар сифати ҳақида ўйлаб кўриши керак. Энди «Аталанта»да уч ўйиндан кейин тўрт очко, «Славия»да – икки.
«Қорабоғ» илк дақиқадаёқ басклар дарвозасини ишғол қилди – мезбонлар ўз жарима майдони яқинида бир-бирига бошда узатма беришда эҳтиётсизлик қилишди ва Андраде зарба бериш позициясига чиқиб борди. Аммо меҳмонларда шундан кейин бундай совғалар бўлмади, мезбонлар эса савиядаги фарқни кўрсатиб қўйишди. Билбаоликлар зарбалар бўйича 21:9 ҳисобида устунлик қилишди, тўпга эгалик қилиш кўрсаткичи – 60 га 40 фоиз. Мавсум бошидан буён барча турнирлар доирасида иккинчи ғалабасини қўлга киритган «Атлетик» ниҳоят еврокубокда муҳим очколарга эга бўлди.
