Еврoиттифоқ Россияга қарши 19-санкция пакетини тасдиқлади

Европа Иттифоқи мамлакатларининг доимий вакиллари Украинага нисбатан тажовузкор уруш учун Россияга қарши 19-санкция пакетини маъқуллади. Бундай қарор чоршанба, 22 октябр куни Брюсселдаги Европа кенгаши йиғилиши олдидан қабул қилинди.

«Биз хурсандмизки, ЕИнинг барча аъзо давлатлари ҳозиргина 19-санкция пакетига бўлган эътирозларини олиб ташлашга тайёр эканини билдирди. Шу муносабат билан ёзма тартибда маъқуллаш жараёни бошланди. Агар эътироз келиб тушмаса, пакет эртага соат 8:00 гача қабул қилинади», — дея Дания (ЕИда раислик қилаётган мамлакат) баёнотини Reuters агентлиги келтиради.

Москвага қарши янги чекловлар якдиллик билан маъқулланди. Санкцияларга қаршиликни энг охиргилардан бўлиб Словакия қайтариб олди. Илгари Австрия ҳам пакетни тўсмаслигини ваъда қилган эди.

Аввалроқ Венгрия бош вазири Виктор Орбан Европа кенгаши мажлисига кечикиши маълум қилинди, у ўз овозини Словакия бош вазири Роберт Фицога топширди.

Еврокомиссия 19-санкция пакетини сентябр ўрталарида тақдим этган. Унга кўра, 2027 йил 1 январдан Россиядан суюлтирилган табиий газ (LNG) импорти тўлиқ тақиқланади. Бундан ташқари, «соядаги флот» деб аталувчи кемалар рўйхати кенгайтирилади. Шунингдек, санкцияларни четлаб ўтиб, жумладан криптовалюталар ёрдамидаги операциялар орқали РФ энергоресурслари савдосида кўмаклашаётган учинчи мамлакатлардаги компаниялар ҳам чекловларга тушади.

Кутилишича, янги чекловлар «Роснефть» ва «Газпром нефть» билан ҳар қандай битимни тақиқлайди, шунингдек, Россия нефтига қўйилган нарх чегарасини ҳам пасайтиради.

19-пакетни тайёрлаш пайтида россияликларга туристик Шенген визаларини беришга чекловлар ҳам муҳокама қилинганди. Бироқ якунда визавий чекловлар рўйхатга киритилмади.