Қўшимча функционаллар
-
Тунги кўриниш
Гиёҳвандликка қарши кураш: уч ҳудудда йирик миқдордаги моддалар мусодара қилинди
Давлат хавфсизлик хизмати (ДХХ) бошқа ҳуқуқ-тартибот идоралари билан ҳамкорликда гиёҳвандлик воситаларининг ноқонуний айланмасига қарши тезкор тадбирлар ўтказди. Самарқанд, Сурхондарё ва Хоразм вилоятларидаги тадбирлар чоғида бир неча шахс қўлга олинди, 10 килограммдан ортиқ ошкора моддалар ашёвий далил сифатида олинди.
Самарқанд вилояти — контрабанда “опий” (8 кг 860 гр)
Ургут туманида яшовчи, 1998 йилда туғилган шахс айланма йўллар орқали Тожикистондан 8 кг 860 гр “опий”ни ноқонуний равишда олиб киришга уринган. ДХХ Чегара қўшинларининг тўхташ тўғрисидаги қонуний талабига бўйсунмасдан қочган шахс тезкор чоралар натижасида қўлга олинди. Терговга қадар текширувда унинг жиноий шериги — Ургут туманида яшовчи шахс ҳам процессуал тартибда ушланди.
Сурхондарё вилояти — Деновда “опий” (жами 1 кг 514 гр)
Денов туманида муқаддам гиёҳвандлик жинояти учун судланган шахс текширув пайтида ёнида 31 гр “опий” билан ушланди. У моддани туман фуқаросидан харид қилганини айтди. Кейинги тинтувда ушбу шахснинг яшаш уйидан 1 кг 483 гр “опий” топилиб, ашёвий далил сифатида расмийлаштирилди.
Хоразм вилояти — Гурланда “гашиш” (877 гр) сотув пайтида
Гурлан туманида муқаддам икки маротаба судланган шахс 877 гр “гашиш”ни 14 минг АҚШ долларига сотиш вақтида қўлга олинди. Тергов материалларига кўра, модда юртга Тожикистонлик наркокурерлар орқали айланма йўллардан олиб кирилган.
Барча ҳолатлар бўйича Жиноят кодексининг тегишли моддалари билан жиноят ишлари қўзғатилди, гумон қилинувчиларга нисбатан “қамоқ” эҳтиёт чораси қўлланди.
