DW хабарига кўра, Россия Мудофаа вазирлиги 21 октябр куни Калининград вилоятида Су-30 ҳалокатга учраганини маълум қилган. Вазирлик самолёт режали ўқув-машғулот парвозини бажараётгани, бортида ўқ-дори бўлмагани ва одамлар яшамайдиган ҳудудга қулаб тушганини билдирган.
Расмий маълумотда учувчилар катапульта орқали чиқишга улгургани ва эвакуация қилингани айтилган. Уларнинг ҳаётига хавф йўқ.
Кейинроқ уруш тарафдори бўлган россиялик блогер Кирилл Фёдоров Telegram каналида Су-30 суратини эълон қилиб, бир кунда иккита самолёт йўқотилганига ишора қилган.
Россия Ҳаво-космик кучлари билан боғлиқ Fighterbomber ва «Воевода вещает» каналлари ҳам иккинчи қирувчи ҳалокатга учраганини англатувчи хабарлар тарқатган. Fighterbomber «Кулфат ёлғиз келмайди», деб ёзган, бироқ тафсилотларни келтирмаган. «Воевода вещает» эса кунни Ҳаво-космик кучлари учун «ниҳоятда оғир» деб атаган.
Блогерлар маълумотига кўра, иккинчи самолёт экипажи ҳалок бўлган. Бироқ хабар эълон қилинган пайтда Россия Мудофаа вазирлиги бу ҳодиса юзасидан баёнот бермаган. Самолётнинг қаерда ва қандай шароитда йўқотилгани ҳам очиқланмаган.
Украинанинг «Мілітарний» портали гап Су-30СМ модификацияси ҳақида кетаётган бўлиши мумкинлигини тахмин қилган. Бу маълумот ҳам расман тасдиқланмаган.
Калининград вилоятида Су-30 билан боғлиқ ҳалокат аввал ҳам юз берган. 2023 йил августда ўқув парвозини бажараётган шу турдаги қирувчи қулаб, экипажи ҳалок бўлган эди.
DW Россия ҳарбий авиациясининг бошқа жанговар ҳаракатларга боғлиқ бўлмаган йўқотишларини ҳам эслатган. Жумладан, Россия Мудофаа вазирлиги маълумотига кўра, 29 сентябрда Амур вилоятида ўқув парвози вақтида Ту-95 стратегик бомбардимончиси ҳалокатга учраб, олти нафар экипаж аъзоси ҳалок бўлган, бир киши жароҳатланган.
Шунингдек, 1 апрелга ўтар кечаси вазирлик Россия аннексия қилган Қримда Ан-26 ҳарбий-транспорт самолёти қулаганини тан олган. Ўша ҳодисада олти нафар экипаж аъзоси ва 23 йўловчи ҳалок бўлган.
