Қўшимча функционаллар
-
Тунги кўриниш
Милей партияси Аргентинадаги оралиқ сайловларда ғалаба қозонди
Аргентина Конгрессига ўтказилган оралиқ сайловларда деярли 100 фоиз бюллетен ҳисоблангандан сўнг, президент Хавер Милей раҳбарлигидаги Либертариан партияси кирган ўнг “Эркинлик илгарилайди” алянси 40 фоиздан ортиқ овоз олди.
Якшанба, 26 октябр куни ўтган парламент оралиқ сайловларида Аргентина президенти Хавер Милейнинг Либертариан партияси таркибидаги ўнг алянс — “Эркинлик илгарилайди” — муҳим ғалабага эришди. Ҳукумат аппарати раҳбари Гилермо Франконинг маълум қилишича, 97 фоиз бюллетен қайта ишланган натижаларга кўра, алянс 40,7 фоиз овоз тўплади.
Бундан ташқари, Милей партияси пойтахт Буэнос-Айресда, шунингдек Кордова ва Санта-Фе провинцияларида ғалаба қозонди. Узоқ йиллар давомида Буэнос-Айрес ултралибералларнинг асосий рақиби — собиқ президент Кристина Фернандес де Киршнер бошчилик қилган марказчи-сўл қанот “Ватан кучи” коалициясининг таянч ҳудуди ҳисобланарди. Оралиқ сайловлар натижасига кўра ушбу коалиция 31,6 фоиз овоз олди.
Оралиқ сайловлар Милей учун тахминан икки йил аввал лавозимга киришганидан ва қаттиқ тежамкорликка қаратилган радикал сиёсатни бошлаганидан бери биринчи синов сифатида баҳоланмоқда.
“Бугун биз бурилиш нуқтасига етдик. Бугун буюк Аргентина қурилиши бошланади”, — деди 55 ёшли президент Буэнос-Айресдаги сайловолди тадбирида ўз тарафдорлари олдида. У “Аргентина тарихидаги энг ислоҳотчи Конгресс” билан аллақачон бошланган қаттиқ тежамкорлик курсини давом эттиришга ваъда берди.
Оралиқ парламент сайловларида палатадаги 257 ўриннинг ярми ва Сенатдаги 72 ўриннинг учдан бири қайта тақсимланди. Милей партияси шу пайтгача ҳар икки палатада камчиликда эди. Сайловлардан сўнг Милейнинг айтишича, партияси ўринларни уч баробардан кўпроқ ошириб, эндиликда палатада 37 ўрин ўрнига 101 ўринни, Сенатда эса олти ўрин ўрнига 20 ўринни эгаллайди.
