Қурилиш қоидаларини бузгани учун «Dream House Design» МЧЖнинг лицензияси бекор қилинди

Шаҳарсозлик нормалари ва қоидаларига зид ишлаб чиқилган лойиҳа учун «Dream House Design» корхонасининг лицензияси бекор қилинди. Бу ҳақда Қурилиш вазирлиги хабар берди.

Қурилиш ва уй-жой коммунал хўжалиги соҳасида назорат қилиш инспекциясининг тегишли тақдимномаси асосида корхона фаолиятида бир қатор камчиликлар аниқланган. Натижада ташкилотга нисбатан тегишли чоралар кўриш масаласи кўтарилган.

Бундан ташқари, 2024 йил 21 февралда Олмазор туманининг Фаробий ва Ҳуррият кўчаларида яшовчи фуқаролардан вазирликка мурожаатлар келиб тушган. Унда фуқаролар «Glorious Chigatoy» корхонасининг қурилиш ишлари ва «Dream House Design» ишлаб чиққан лойиҳа ҳужжатларидан норози эканликларини билдирган. Ўрганишларда пастки қаватида савдо ва маиший хизмат кўрсатиш объектлари бўлган бизнес маркази ва автотураргоҳ мажмуаси лойиҳаси шаҳарсозлик нормалари ва қоидаларига зид тарзда ишлаб чиқилгани аниқланган. Хусусан, лойиҳада бинолар ўртасидаги масофа ва қуёш нури тушишини таъминлаш (инсотляция) ҳамда қўшни мулк эгалари билан келишиш талаблари эътиборга олинмаган.

Натижада Қурилиш вазирининг тегишли буйруғи билан лицензия 10 кунга тўхтатилиб, компанияга бунга сабаб бўлган ҳолатларни бартараф этиши учун муддат берилган. Бироқ лицензиат ўз вақтида камчиликларни тузатмаган.

Вазирлик «Dream House Design» лицензиясини вақтинча тўхтатиб туриш бўйича Тошкент туманлараро иқтисодий судига даъво аризаси киритган. Суднинг 2024 йил 18 июлдаги ҳал қилув қарорига мувофиқ компания лицензиясининг амал қилиши вақтинча тўхтатилган.

Бироқ «Dream House Design» қонунбузарликларни белгиланган муддатда бартараф этмагани боис Тошкент туманлараро иқтисодий судининг жорий йил 11 сентябрдаги қарори билан 2021 йил 13 мартда унга берилган 071935-сонли (IV-тоифа) лицензия бекор қилинди ҳамда лицензиялар реестридан чиқарилган.