РФ Вуоксадаги ГЭС бўйича 1972 йилги Финландия билан тузилган шартномани тўхтатди

Россия ҳокимияти Вуокса дарёсидаги ГЭС учун электр энергияси компенсациясига оид 1972 йилги Финландия билан шартномани тўхтатди. Москва таъкидлашича, Ҳелсинки 2022 йил баҳоридаёқ Россиядан электр энергиясини қабул қилишдан ўзи воз кечган.

Фото: Ian Murray/picture alliance

Россия Вуокса дарёсидаги ГЭСдан Финландияга компенсацион электр етказиб бериш тўғрисидаги 1972 йилги совет-фин шартномасининг икки моддасини тўхтатди. Бундай тартиб бош вазир Михаил Мишустиннинг 1 ноябр куни эълон қилинган фармойишида кўрсатилган.

Ҳужжатга кўра, таклифни Россия Энергетика вазирлиги ва Ташқи ишлар вазирлиги киритган. Москва бунга сабаб қилиб «фин томонининг электр энергиясини қабул қилишдан бир томонлама воз кечиши»ни келтирди — бу ҳолат 2022 йил баҳорида, Финландия Украинага босқин фонида Россиядан электр импортни тўхтатган пайтда юз берган.

Ҳужжатдан англашилишича, Россия 1972 йилги шартномани бутунлай бекор қилмаган, балки ундаги Финландияга компенсацион электр етказиб беришга оид икки банднигина тўхтатган.

Вуокса дарёси Финландиядаги Сайма кўлидан бошланиб, тахминан 13 км фин ҳудуди орқали оқади. Кейин дарё Россия чегарасини кесиб ўтиб, яна тахминан 100 км оқиб Ладога кўлига қуйилади.

Вуоксада фин томонида Тайнионкоски ва Иматра ГЭС, Россия томонида эса Светогорская ва Лесогорская ГЭС қурилган. Чегарага энг яқин фин станцияси — Иматра, рус станцияси — Светогорская.

1948 йилда Светогорская ГЭС ишга тушгач, унинг тўғони сабаб дарёнинг юқори қисмида сув сатҳи кўтарилди. Бу эса финларнинг Иматра станциясида электр ишлаб чиқариш ҳажмини қисқартирди.

1972 йилда Ҳелсинкида СССР ва Финландия ўртасида Иматрадан Светогорскача бўлган Вуокса участкаси эксплуатацияси ҳақида шартнома имзоланган. Москва Финландия томони кўрган зарарни қоплаш мақсадида йилига 19 900 МВт·соат электр энергиясини етказиб бериш мажбуриятини олган эди.