РФнинг Днипропетровск вилоятига зарбалари: қурбонлар ва жароҳатланганлар бор

Россия қўшинлари 4 ноябр куни Украинадаги Днипропетровск вилоятининг Синелниково туманига бошқариладиган авиабомбалар ва учувчисиз аппаратлар ёрдамида “кенг кўламли ҳужум” уюштирди, деб хабар берди Украина Фавқулодда вазиятлар бўйича давлат хизмати.

Маълумотларга кўра, Покровск жамоатида поселка марказига қилинган авиаҳужум натижасида икки эркак, жумладан бир полициячи ҳалок бўлди. Яна тўрт киши, шу жумладан полиция xодими яраланди. Днипропетровск вилояти ҳарбий маъмурияти (ВҲМ) раҳбари Владислав Гайваненко аниқлаштиришича, ҳалок бўлганлар 47 ва 35 ёшда эди.

Ҳужум жойида ёнғин чиқди, у аллақачон ўчирилди. Дўконлар, савдо павилонлари, кафе, сартарошхона, автомобиллар ва беш қаватли турар жой биноси зарар кўрган. Петропавловск жамоатида хусусий уй ёнган, яна уч уйга зарар етган. Хўжалик иншоотлари ва автомобиллар ҳам вайрон бўлган.

Шу орада Днипропетровск ВҲМ раҳбари таъкидлашича, Синелниково туманидаги Миколайив жамоатига қилинган тунги ҳужумдан жабрланганлар сони тўққиз нафарга етди: 14 ёшли қиз тиббий ёрдам сўраб мурожаат қилган ва касалхонага ётқизилган.

4 ноябр тонгида Россия қўшинлари Украинанинг бир нечта минтақасига навбатдаги ҳаво ҳужумларини амалга оширди. Днипропетровск вилоятининг Миколайив жамоатида ракета ва дрон қўлланган қўшма зарба натижасида 65 ёшли аёл ҳалок бўлгани ҳақида Гайваненко аввалроқ хабар қилган эди.