DW хабарига кўра, Зеленский бу ҳақда 18 октябр куни Bloomberg агентлигига берган интервюсида гапирган.
Украина раҳбари АҚШ Конгрессига 3 ноябрда ўтказиладиган оралиқ сайловлар олдидан Киев учун «хавфли кунлар» бошланганини айтган. У сайловолди даврида сиёсат кескинлашганини, овоз беришдан кейин вазият тинчланишига умид қилаётганини билдирган.
Зеленскийнинг даъвосига кўра, АҚШ Украина фойдаланаётган Starlink’нинг ҳарбий хизматлар пакети — Starshield ишини атайлаб чеклаган. Шунингдек, Patriot ҳаво ҳужумидан мудофаа тизимларига мўлжалланган тутиб қолувчи ракеталар етказиб бериш кечиктирилмоқда.
У Трамп маъмурияти билан сўнгги музокараларда Россиядаги дизел ёнилғиси ишлаб чиқариш объектларига зарбаларни тўхтатиш эвазига Украина объектларини ҳимоя қилиш учун Patriot ракеталарини беришни таклиф қилганини айтган.
Зеленскийнинг сўзларига кўра, АҚШ томони эса фақат дизел ишлаб чиқаришга ҳужумлар тўхтатилишини истамоқда. Украина президенти зарбалар давом этса, бошқа имкониятлардан фойдаланиш ҳам чекланиши мумкинлигидан хавотир билдирган.
«Украинани таслим бўлишга кўндириш учун қадамлар ташланган деб ҳисоблайман», — деган Зеленский. Бироқ у буни АҚШнинг аниқ мақсади деб аташдан тийилган.
«Ҳамкорларимиз шу мақсадни кўзлаяпти, демаяпман. Америкалик ҳамкорларимиз урушни Украина ҳисобига тезроқ тугатиш мумкин деб ўйлашини истамайман. Аммо бу шундай кўринмоқда», — дея таъкидлаган у.
Зеленский, шунингдек, Трампнинг Владимир Путин билан муносабатларини яхши деб баҳолаган, аммо бу ҳозирча урушни тўхтатишга олиб келмаётганини айтган.
Украина Мудофаа вазирлиги маълумотига кўра, Starshield ишидаги чекловлар 14 октябрга ўтар кечаси пайдо бўлиб, учувчисиз тизимлар фаолияти ва логистикани қийинлаштирган. 15 октябрда эса вазирлик дала шароитида тизим иши тикланганини хабар қилган.
АҚШ давлат котиби Марко Рубио 17 октябрда Вашингтон алоқани атайлаб чеклагани ҳақидаги даъволарни рад этган. Трамп ҳам аввалроқ ўзи бундай кўрсатма бермаганини, Илон Маск ҳам буни қилган деб ўйламаслигини билдирган эди.
