Олий Радада ҳукуматни қисман эмас, тўлиқ истеъфога чиқариш талаби можарога айланди

Кенг кўламли коррупция можароси шароитида Украина парламенти адлия ва энергетика вазирларини истеъфога чиқариш масаласини кўриб чиқиши керак эди. Бироқ мухолифат бутун ҳукумат истеъфосини талаб қилиб, минбарни блоклаб қўйди.

Фото: Andrii Nesterenko/REUTERS

Украина Олий Радаси 18 ноябр куни адлия вазири Герман Галушченко ва энергетика вазири Светлана Гринчук истеъфоси учун овоз бера олмади, чунки «Европейская солидарность» партияси фракцияси вакиллари минбарни блоклаб қўйди.

Кун тартибига фақат Галушченко ва Гринчукни лавозимидан озод этиш масаласи киритилган эди. Аммо «Европейская солидарность» вакиллари фақат икки вазир эмас, балки бош вазир Юлия Свириденко ҳукуматининг тўлиқ таркибини истеъфога чиқаришни талаб қилди. Шундан кейин Олий Рада раиси Руслан Стефанчук мажлисни ёпди.

Галушченко 12 ноябр куни «Энергоатом» компаниясидаги коррупция иши бўйича шов-шувли тергов фонда Украина адлия вазири сифатидаги вазифаларини бажаришдан четлатилган эди. Ўша куниёқ Светлана Гринчук ҳам истеъфо ҳақида ариза берган.

Мажлис арафасида Украина собиқ президенти ва «Европейская солидарность» партияси раҳбари Пётр Порошенко бутун Украина ҳукуматини истеъфога чиқаришга чақирган эди. Фақат икки вазир лавозимини йўқотганини у «профанация» деб атади ва «ошкор қилинган ёзувларда камида беш мансабдорнинг фамилияси тилга олинади», дея қўшимча қилди.

Украина Миллий антикоррупция бюроси (НАБУ) ва Махсус антикоррупция прокуратураси (САП) 10 ноябр куни давлатга қарашли энергетика компанияси «Энергоатом» атрофида кенг кўламли коррупция схемаси фош этилганини маълум қилди.

Можаро марказида Украина ҳукуматининг бир қатор вазирлари, президентнинг кўп йиллик ҳамкори Тимур Миндич ва молиячи Александр Цукерман қолган. Ўша куниёқ ҳуқуқни муҳофаза қилувчи органлар Миндич уйида, «Энергоатом»да, шунингдек Украина адлия вазири Герман Галушченко офисида тинтув ўтказди. Миндич эса бундан олдин Украинадан чиқиб кетган эди.

12 ноябр куни Зеленский вазифалари икки кун олдин тўхтатиб қўйилган адлия вазири Герман Галушченко ва энергетика вазири Светлана Гринчукни ишдан бўшатишни талаб қилди. Иккала вазир ҳам Зеленский баёнотини ортидан деярли дарҳол истеъфо аризасини тақдим этди. 13 ноябр куни эса Зеленский Миндич ва Цукерманга қарши санкциялар жорий этиш тўғрисидаги фармонни имзолади.