Ўзбекистон ва Швеция ўртасида органик қуёш батареялари бўйича ҳамкорлик йўлга қўйилмоқда

“Ўзэлтехсаноат” уюшмаси, Марказий Осиё экология ва иқлим ўзгариши тадқиқотлари университети ҳамда Швециянинг Epishine компанияси вакиллари ўртасида онлайн учрашув бўлиб ўтди, деб хабар бермоқда “Дунё” АА мухбири.

1996 йилда Швециянинг Линчёпинг шаҳрида ташкил этилган Epishine компанияси органик қуёш батареяларини ишлаб чиқаришга ихтисослашган.

Мулоқот чоғида Ўзбекистонда электротехника саноати, энергия тежовчи ва “яшил” технологиялар соҳасида амалга оширилаётган ислоҳотлар, хорижий компаниялар учун яратилган қулай шарт-шароит ва имкониятлар ҳақида батафсил маълумот берилди.

Epishine компаниясининг халқаро маркетинг директори Флорент Пеллиссиер ўзбек электротехника корхоналари билан инновацион маҳсулотлар асосида ишлаб чиқаришни йўлга қўйиш бўйича кооперация ҳамкорлигини ривожлантиришга тайёрлигини билдирди. Компаниянинг ҳамтаъсисчиси эса Linköping University билан биргаликда илмий-техникавий алоқалар ўрнатишдан манфаатдор экани қайд этилди.

Суҳбат давомида тежамкор инновацион батарея технологиясини Ўзбекистонга жалб этиш ва локализация қилиш, шу йўналишда қўшма тадқиқот лойиҳаларини ишлаб чиқиш масалалари муҳокама этилди.

Томонлар ишлаб чиқаришни йўлга қўйиш мақсадида маҳаллий корхоналар билан музокаралар ўтказиш, шунингдек, Epishine компанияси раҳбарининг Ўзбекистонга ташрифини ташкил этиш бўйича дастлабки келишувларга эришди.

Шу билан бирга, Марказий Осиёдаги биринчи эко-университет — Green University ва Linköping University ўртасида қўшма ўқув дастурлар, илмий тадқиқотлар ва талабалар алмашинувини йўлга қўйиш бўйича тегишли чора-тадбирлар ишлаб чиқилиши келишиб олинди.