“Ёшлар дафтари”даги фаол бўлган 1 минг нафар ёшларга ҳар йили пул мукофоти берилади

Фармонга мувофиқ, “Ёшлар дафтари” доирасида ёшларга кўрсатилаётган ижтимоий ёрдам энди “ижтимоий шартнома” механизми асосида, уларнинг ўқиши, фаоллиги ва шахсий ривожланишига боғланган ҳолда амалга оширилади.

Ҳужжатга кўра, ижтимоий шартнома шартлари бажарилмаган тақдирда босқичма-босқич қуйидаги чоралар қўлланади:

• шартлар бажарилмаганлиги юзасидан 15 кун ичида бажариш тўғрисида огоҳлантириш;
• белгиланган талаблар бажарилмаса, ижтимоий ёрдам миқдорини 15–30 фоизга камайтириш;
• такрорий ҳолатларда ижтимоий ёрдамни 1 ойдан 6 ойгача вақтинчалик тўхтатиш;
• шартлар системали равишда бажарилмаса, 1 йил ва ундан ортиқ муддатга тўхтатиш.

Шу билан бирга, ижтимоий шартнома шартларини камида 6 ой давомида юқори даражада ва мунтазам бажариб келаётган ёшлар қуйидагича рағбатлантирилади:

• уларга имтиёзли равишда, навбатдан ташқари ижтимоий ёрдам кўрсатилади;
• энг яхши 1 000 нафар ёш ҳар йили бир марта БҲМнинг 3 баравари миқдорида пул мукофоти билан тақдирланади;
• бу ёшлар ташаббускорлик ва фаолликни рағбатлантиришга қаратилган давлат ва жамоат мукофотларига тавсия этилади.

Мазкур тартиб “Ёшлар дафтари” орқали моддий кўмакни шунчаки ёрдам эмас, балки ёшларнинг таълим олиши, фаол фуқаролик позицияси, китобхонлиги ва ижтимоий масъулияти билан боғлиқ комплекс тизимга айлантиришга қаратилгани қайд этилмоқда.