Бишкекда Атамбаевнинг ўғли ва собиқ депутатлар ушланди

Қирғизистонда бир неча маҳаллий сиёсий арбоблар ва собиқ президент Алмазбек Атамбаевнинг ўғли Қодирбек Атамбаев қўлга олинди. «Қўлга олинганлар: Қодирбек Атамбаев, Миллий хавфсизлик давлат қўмитаси (МХДҚ) Давлат қўриқлаш хизмати собиқ бошлиғи Дамир Мусакеев, социал-демократлар сиёсий партияси раҳбари Темирлан Султанбеков, Қирғизистон парламентининг собиқ депутатлари Шайлобек Атазов ва Қубаничбек Қодиров», — дейилади якшанба, 23 ноябр куни эълон қилинган Қирғизистон Ички ишлар вазирлиги матбуот хизмати баёнотида.

ИИВ баёнотига кўра, қўлга олинган бу беш киши «республика парламенти сайлов натижалари эълон қилинганидан кейин, гўё оммавий норозилик мавжудлигини кўрсатиш мақсадида митинглар силсиласини бошлашни режалаштирган». Хусусан, вазирлик версиясига кўра, улар «конституцияга зид талаблар» қўйишни ҳамда «маъмурий биноларни, телеканалларни, куч ишлатар тузилмалар объектларини, қурол-яроғ ва жазони ижро этиш муассасаларини эгаллашга уринишлар» ҳақида режалар тузган. Бу ҳаракатларнинг куч жиҳатидан қўллаб-қувватланишини «криминал элементлар» таъминлаши керак эди, дея таъкидлайди ИИВ.

«Қидирув чоралари давомида қурол-яроғ, ўқ-дорилар, гранаталар, алоқа воситалари, молиялаштиришга оид ҳужжатлар, ҳаракат режалари, наркотик моддалар, шунингдек 150 минг доллар миқдорида пул маблағлари мусодара қилинди», — дея маълум қилди вазирлик матбуот хизмати Бишкекдаги баёнотида. Қўлга олинганларга мамлакат Жиноят кодексининг «Оммавий тартибсизликлар ташкил этишга тайёргарлик кўриш» моддаси бўйича айблов эълон қилинган.

Қирғизистон парламентига навбатдан ташқари сайловлар 30 ноябр куни бўлиб ўтади. Улар дастлаб 2026 йил ноябрига режалаштирилган эди, бироқ 25 сентябр куни депутатлар ихтиёрий равишда ўз ваколатларини топширди.

Қўлга олинишлардан бир нечта соат ўтгач, Бишкекнинг Биринчи май туман суди тергов органининг илтимосномасини қаноатлантириб, Темирлан Султанбековни 17 январгача қамоқда қолдириш тўғрисида қарор чиқарди. У билан бирга, аввалроқ қўлга олинган Эрмек Эрматов ва Урмат Аскарбеков ҳам тергов изоляторига жўнатилади, деб хабар бермоқда 24.KG нашри.

Қайд этилишича, шу судга қўлга олинган бошқалар — Қодирбек Атамбаев, Дамир Мусакеев, Шайлобек Атазов ва Қубаничбек Қодиров ҳам олиб келинган. Тергов уларга нисбатан ҳам қамоқ эҳтиёт чораси қўллашни сўрамоқда, деб ёзади маҳаллий ОАВ.

22 ноябр куни собиқ президент Атамбаевнинг рафиқаси ва ўғли Қирғизистон Ташқи ишлар вазирлигига чақирилган. Худди шу куни ҳуқуқни муҳофаза қилувчи органлар мамлакатда оммавий тартибсизликлар иши доирасида тинтувлар ўтказган. Маҳаллий ОАВ маълумотларига кўра, иқтисодий жиноятларга қарши кураш бўйича Давлат хизмати собиқ раҳбари Сиймиқ Жапикеев ҳам ушланган.

Тинтувлар парламентнинг собиқ депутатлари Қубаничбек Қодиров ва Шайлобек Атазов уйларида ҳам ўтказилган. Мамлакатнинг собиқ раҳбари қизи Алия Шагиева содир бўлаётган воқеаларни «сиёсий таъқиб, инсон ҳуқуқларини бузиш, сўз эркинлигини чеклаш» деб таърифлади.

Сентябр ўрталарида Бишкекдаги суд «Клооп» мустақил ахборот порталининг икки собиқ ходимини оммавий тартибсизликларга даъват қилиш тўғрисидаги модда бўйича айбдор деб топиб, 5 йил озодликдан маҳрум этиш жазосига ҳукм қилди. Бундан ташқари, икки бухгалтерга 3 йилдан пробация (яъни қамоқ жазоси ўрнига назорат остида бўлиш — таҳр.) тайинланди.

Айблов томони версиясига кўра, судланувчилар суриштирувлар билан шуғулланувчи журналист Болот Темиров билан биргаликда тайёрланган материалларни тарқатиш ва эълон қилишда иштирок этган. Гўёки ушбу қўшма журналистик суриштирувлар «мамлакат раҳбариятига нисбатан ҳақиқатга тўғри келмайдиган маълумотлар ва асоссиз танқидни» ўз ичига олган. Судланувчилар эса ўзининг айбини тан олиш баёнотлари ҳокимият органлари босими остида олинганини маълум қилган.