Долзарблигини йўқотган 800 га яқин ҳужжат бекор қилинади

Адлия вазирлиги томонидан ишлаб чиқилган “Қонунчиликдаги ҳуқуқий бўшлиқларни бартараф этиш ва тартибга солиш юкини камайтириш тўғрисида”ги президент фармони қабул қилинди.

Фармонга мувофиқ, амалда ўз аҳамияти ва долзарблигини йўқотган 800 га яқин қонунчилик ҳужжатлари “тартибга солиш гилотинаси” механизми орқали бекор қилинади. Бу орқали ортиқча бюрократик талабларни қисқартириш, ҳуқуқий аниқликни таъминлаш ва қонунчиликни замонавий талабларга мослаштириш кўзда тутилган.

Ҳужжат билан тадбиркорлик ва бошқа соҳалардаги айрим мажбурий талабларни қисқартириш, тартибга солишни соддалаштириш бўйича “йўл харитаси” тасдиқланди. Жумладан, у қуйидагиларни назарда тутади:

• тадбиркорлар учун молиявий операцияларни E-aktiv тизимида акс эттириш мажбуриятини бекор қилиш;
• кўчмас мулкка нисбатан гаров ҳуқуқини рўйхатга олишда давлат хизмати нархини 2 бараварга камайтириш;
• шахсий эҳтиёж учун республикага олиб кириладиган товарларнинг божсиз олиб кириш нормаларини тўлиқ қайта кўриб чиқиш;
• ер участкасига бўлган ҳуқуқини ўзига боғлиқ бўлмаган сабабларга кўра рўйхатдан ўтказмаган ногиронлиги бўлган шахсларга муқобил ҳужжатлар асосида солиқ имтиёзларидан фойдаланиш имконини яратиш.

Фармонда белгиланган чора-тадбирлар қонунчиликдаги ҳуқуқий бўшлиқларни бартараф этиш, тартибга солиш юкини камайтириш ва тадбиркорлик фаолияти учун янада қулай ҳуқуқий муҳит яратишга хизмат қилиши кўзда тутилган.