Трамп Украина бўйича тинчлик режаси учун ўз вакилларини Москва ва Киевга юбoрди

АҚШ президенти Доналд Трампнинг махсус вакили Стив Уиткофф Трамп топшириғига биноан Москвага жўнаб кетди. У ерда у Россия Федерацияси президенти Владимир Путин билан учрашиб, Украина бўйича тинчлик режасининг якуний вариантни келишиб олиши керак бўлади. Шу билан бир вақтда, Трамп Украина бўйича музокарачи этиб тайинлаган АҚШ қўшинлари вазири (армия вазири) Дэниел Дрисколл Киевда украин томони билан шу мавзуда маслаҳатлашувлар ўтказади. Бу ҳақда Трамп сешанба, 25 ноябр куни ўзининг Truth Social ижтимоий тармоғида маълум қилди.

«Қўшма Штатлар томонидан ишлаб чиқилган 28 банддан иборат дастлабки тинчлик режаси ҳар икки томондан қўшимча таклифлар билан такомиллаштирилди ва унда тортишувларга сабаб бўлаётган жуда оз сонли бандлар қолди, холос», — деб ёзди Оқ уй раҳбари.

Шу куни у президент самолёти бортидаги мухбирларга Уиткофф, эҳтимол, келаси ҳафта Путин билан учрашишини айтди. Шунингдек, Трампнинг айтишича, унга (Уиткоффга) бу сафарда жараёнда «иштирок этаётган» куёви ва маслаҳатчиси Жаред Кушнер ҳамроҳлик қилиши мумкин.

Доналд Трамп ўз постида яқин вақт ичида Владимир Путин ва Украина президенти Володимир Зеленский билан учрашишга умид қилаётганини қайд этди. Бироқ, у огоҳлантиришича, бу учрашув Украинадаги урушни якунлаш бўйича якуний келишув тузилган тақдирда ёки ана шу келишувни тайёрлаш жараёни якуний босқичга киргандагина бўлиб ўтади.

23 ноябр куни Швейцариянинг Женева шаҳрида АҚШ, Украина ва бир неча Европа давлатлари делегациялари Украинадаги урушни тугатиш учун Вашингтон томонидан таклиф этилган 28 бандли режани муҳокама қилиш учун учрашди. Дастлабки вариантда ушбу ҳужжат Москва талабларини катта даражада акс эттирувчи бир қатор бандларни ўз ичига олган эди. Европа томони маълумотларига кўра, Женевадаги учрашувда мазкур лойиҳани муайян даражада ўзгартириш юзасидан келишувга эришилган.

25 ноябр куни кечқурун Украина президенти офисининг раҳбари Андрей Ермак Дэниел Дрисколл билан телефон орқали гаплашганини ва унинг жорий ҳафтада Киевга ташриф буюришига умид қилишини билдирди.

Шу куннинг ўзида АҚШнинг Axios онлайн-нашри Андрей Ермакка таяниб хабар беришича, Володимир Зеленский урушни тугатиш шартлари бўйича АҚШ–Украина келишувларини якуний келишиб олиш учун Доналд Трамп билан «имкон қадар тезроқ» учрашмоқчи. Нашр ёзишича, Трамп ва Зеленскийнинг учрашуви АҚШда 27 ноябр куни нишонланадиган Миннатдорчилик кунида бўлиб ўтиши мумкин.