Ҳонгконг шимолидаги 32 қаватли биноларда келиб чиққан ёнғин 24 соатдан кейин ҳам тўлиқ жиловланмади: кучли аланга қутқарувчилар ишини қийинлаштирмоқда. Қурбонлар сони 65 кишига етди, яна юзлаб инсонлар билан алоқа йўқолган. Ҳукумат махсус ёрдам фондини очди, мажмуани таъмирлаётган компаниянинг 3 нафар расмийси ҳибсга олинган.
26 ноябр – чоршанба куни тушдан сўнг Ҳонгконг шимолидаги турар жой мажмуасида катта ёнғин бошланган эди. Ҳамон тўлиқ ўчирилмаган ёнғин оқибатида камида 65 киши вафот этган, қарийб 300 киши бедарак йўқолган, деб ёзмоқда Associated Press.
Фото: AP Photo/Chan Long HeiФото: AP Photo/Chan Long HeiФото: AP Photo/Chan Long HeiФото: AP Photo/Chan Long Hei
Тай По туманида жойлашган Wang Fuk Court турар жой мажмуасининг юқори қаватларида қолиб кетгани тахмин қилинаётган одамлар олдига бориш қийинлашган. Ўт ўчирувчилар деярли бир суткадан буён ёнаётган бинолардан чиқаётган кучли иссиқлик ва қуюқ тутун сабаб қийинчиликка дуч келмоқда.
Ёнғин нимадан келиб чиқди?
Шимолдаги Тай По туманида аҳоли узоқ муддатдан бери арзон уй-жой танқислигидан азият чекади. Шу сабабли бу ерда кўп уйлар жуда зич қурилган. Хусусан, ёнғин чиққан мажмуада 8 та блок бўлиб, ундаги 2 000 та хонадонда 4,6 мингдан ортиқ аҳоли истиқомат қилган.
Мавзуга оид
New York Times иллюстрацияси
Воқеа жойидан олинган дастлабки видеоларда биноларнинг ташқи тарафи – бамбукдан қурилган енгил конструкция ва яшил қурилиш тўри билан ўралгани кўринади. Маълум бўлишича 1980 йилларда қурилган бинода катта таъмирлаш ишлари ўтказилаётган бўлган.
Фото: AP Photo
Ёнғин бинонинг ташқи қисмида бошланган, сўнг бамбук конструкциялар ва қурилиш тўри орқали бинонинг ичига ва бошқа биноларга тарқалган. Эҳтимол шамолли об-ҳаво алангани кучайтириб юборган бўлиши мумкин.
Расмийлар баланд биноларнинг ташқи деворларида ишлатилган айрим материаллар ёнғинга чидамлилик стандартларига жавоб бермаганини ҳам тахмин қилмоқда. Бу эса ёнғиннинг ғайритабиий тез тарқалишига имкон берган.
Фото: Reuters
Полиция айтишича, ёнғиндан таъсирланмаган яна бир бинода ҳам қурилиш компанияси ўрнатган «кўпикли материал билан муҳрланган» баъзи деразалар топилган.
Қурбонлар ортиши эҳтимоли катта
Пайшанба тонгига келиб, расмийлар ёнғин қамраб олган тўрт блок устидан назорат ўрнатилганини, яна учта блокдаги операция давом этаётганини айтди. Пайшанба тушгача 55 нафар қурбон аниқланган. Улар орасида бир ўт ўчирувчи ҳам бор. Яна 70 дан ортиқ инсон куйиш ва тутундан заҳарланиш оқибатида касалхоналарга ётқизилган.
Фото: Reuters
Associated Press нашрига интервю берган, шу уйда яшовчи Лоуренс Ли хотини билан бўлган воқеани айтиб берди.
«Ёнғин бошланганида мен унга қўнғироқ қилиб, қочишини айтдим. Аммо у квартирани тарк этганда йўлак ва зинапоялар тутун билан тўлган ва ҳаммаси қоронғи бўлиб қолган. Шунинг учун у мажбуран яна квартирага қайтган», деди тун бўйи бошпанада қолган Ли.
Фото: Reuters
Мажмуа биноларидан эвакуация қилинган бошқалар ҳам ўз уйларидан хавотирда ва уйқусиз тунни ўтказган. «Мен бутунлай ухлай олмадим», дейди 75 ёшли Винтер Чунг.
«Устувор вазифа — ёнғинни ўчириш ва қамалиб қолган аҳолини қутқариш. Иккинчиси — жароҳат олганларга ёрдам бериш. Кейин қўллаб-қувватлаш ва тиклаш. Шундан сўнг эса тўлиқ тергов бошлаймиз», деди деди Ҳонгконг раҳбари Жон Ли.
Фото: Reuters
Унинг айтишича, ичкарида қолиб кетгани тахмин қилинаётган 279 киши билан алоқа ўрнатилмаган, қутқарилган 900 киши эса саккизта бошпаналарга жойлаштирилган.
3 киши қамоққа олинди
Ҳонгконг полиция расмийси Эйилин Чунгнинг журналистларга айтишича, ёнғиндан сўнг қурилиш-таъмирлаш компаниясининг икки директори ва бир муҳандис маслаҳатчиси ҳибсга олинган. Улар ёнғин бўйича эҳтиётсизлик оқибатида одам ўлимига сабаб бўлганликда гумон қилинмоқда.
Фото: Xinhua
«Бизда компания масъулларининг қўпол бепарволик қилганига, бу эса ушбу фалокатга ва ёнғиннинг назоратсиз тарқалишига, катта талафотлар юзага келишига олиб келганига асос бор», деди полиция расмийси.
AP нашрининг тасдиқлашича, мажмуа биноларидаги таъмирлаш ишларига масъул бўлган Prestige Construction & Engineering Company офисида тинтув ўтказилган. Полиция кўплаб ҳужжатлар солинган қутиларни далил сифатида олиб чиқиб кетган.
Норозилик ва реакциялар
Ҳонгконг 1997 йилда Буюк Британиядан Хитой таркибига қайтарилган ва Пекин томонидан «Махсус маъмурий ҳудуд» шаклида бошқарилади. Фожиадан сўнг Хитой давлат телеканали Си Жингпингнинг «бор куч билан ёнғинни ўчириш ва талафотларни камайтиришни буюргани» ҳақидаги хабарни эълон қилди.
Фото: AP Photo
Кўплаб маҳаллий аҳоли вакиллари тармоқларда ёнғин сабаби сифатида – эътиборсизлик ва харажатларни тежашни кўрсатиб, танқидлар билдиришни бошлаган.
Фото: AP Photo
27 ноябр куни тушдан сўнг Ҳонгконг ҳукумати турар жой мажмуаси аҳолиси учун 38,5 миллион АҚШ доллари миқдорида ёрдам фонди ташкил қилинишини билдирди. Бундан ташқари, ушбу уйдаги ҳар бир уй хўжалигига пайшанба куни 1200 доллардан фавқулодда ёрдам пули берилади.
Фото: AP Photo
Ҳонгконг Транспорт департаменти айтишича, бугун ҳам ёнғин бўлаётган ҳудуддаги бир нечта йўллар ёпиқ қолади ва 39 автобус йўналиши ўзгартирилган. Ёнғин ва тирбандлик сабаб камида олти мактаб пайшанба кунидан ёпилган.
Аслида қурилиш ва таъмирлашда қўлланган яшил қурилиш тўри ва бамбукли конструкциялар – анъанавий Хитой қурилишининг асосий унсурларидан бўлган. Лекин Ҳонгконгда хавфсизлик сабаб март ойидан бошлаб ундан фойдаланиш босқичма-босқич бекор қилинаётган эди.
Фото: AP Photo
Полицияга кўра, расмийлар шаҳар бўйлаб катта таъмир остидаги барча турар жой мажмуаларида дарҳол текширувлар ўтказишни бошлаган. Унда бамбукли конструкциялар ва қурилиш материалларининг хавфсизлик стандартларига мослиги текширилади.
Фото: AP Photo
Ҳонгконгнинг замонавий тарихидаги энг ҳалокатли ёнғинлардан бири билан кураш пайшанба куни ҳам давом этмоқда.
