Бир неча кун олдин АҚШ президенти Трамп янги таҳрирдаги Миллий хавфсизлик стратегиясини имзолади. Бу ҳужжат ҳар 3-4 йилда бир марта АҚШ ижро ҳокимияти томонидан тайёрланади, президент томонидан имзоланади ва Конгрессга тақдим қилинади. Бу – АҚШнинг ташқи сиёсати, айниқса хавфсизлик ва барқарорлик борасидаги қарашларини билдиради.
Бу сафарги стратегия АҚШнинг шу пайтгача шаклланган қарашларини кескин ўзгартиради. Айниқса, НАТОга, Европа Иттифоқига муносабат кескин ўзгарган. Шу сабаб, бу стратегия Европа Иттифоқидаги АҚШнинг анъанавий иттифоқчиларида, НАТОга аъзо давлатларида анча норозиликларга сабаб бўлди.
Бу стратегияда Россия Федерацияси олдингилари каби “душман” ёки “рақиб” давлат дейилмаган. НАТОнинг кенгайишига, янги аъзолар қўшилишига ҳам салбий муносабат билдирилган. Россия–Украина урушини тезроқ тугатиш ва Россия билан муносабатларни тиклаш таклиф қилинган.
Европа Иттифоқи давлатлари, НАТОга аъзо давлатлар ўзларининг хавфсизлик ва барқарорлик масъулиятларини ўзлари олишлари кераклиги билдирилган. Мана шу фонда, Ғарб давлатлари ОАВларида чиқаётган инсайдер маълумотлар ва уларнинг таҳлиллари шуни кўрсатадики, АҚШ ўзининг стратегик нигоҳини бошқа томон бурмоқда. Бундан кейин АҚШ икки фронтда уруш олиб бориш ниятида эмас. Чунки бунга АҚШнинг ресурслари етарли бўлмаслиги мумкин. Шу сабаб, расмий Вашингтон Россия–Украина урушини тезроқ тугатиш ва бошқа минтақага тўлиқ эътиборини қаратиш ниятида. Гап – Ҳинд-Тинч океани ҳавзаси ҳақида кетмоқда. Оддий қилиб айтганда, АҚШ бундан кейин глобал майдондаги ўзининг энг устувор вазифаси сифатида Хитой Халқ Республикасини тийиб туришни белгилаб олди.
АҚШ НАТОдан чиқиб кетиш ниятида эмас, лекин НАТО доирасидаги ўзининг иштирокини пасайтирмоқчи. Бундан мақсад – бор ресурсларини Ҳинд-Тинч океани ҳавзасига, аниқроғи ХХРга қарши йўналтириш, яъни “Хитой тахдиди”га қарши қаратиш.
Кейинги икки ўн йилликда АҚШ сиёсий элитаси ва президентларининг стратегик нигоҳи Хитой томон кучайиб бормоқда. Совуқ уруш тугаб, СССР қулаган 1990-йилларда Вашинтондаги сиёсий мутафаккирлар Хитойни асосий таҳдид сифатида кўрмас эди. У вақтлар “Хитой бой бўлган сари, у либерал бўлади, либерал бўлган сари АҚШга қулай ва у тарафидаги давлатга айланиб боради” деган қараш устувор эди. Бироқ бугун Хитойни асосий рақиб ва таҳдид деб билиш, Вашингтондаги икки партия учун ва барча кейинги президентлар учун – норма. Айни пайтда, Хитойга қарши тирашувдаги усуллар борасида, қарашлар фарқ қилади.
Ғарб ОАВларидаги хабарларга ва таҳлилларга кўра, Вашингтон Европадаги ўзларининг иттифоқчиларини хабардор қилиб, 2027 йилдан бошлаб Европа/НАТОга одатий қурол-яроқ етказиб берувчилик ролидан воз кечмоқчи. Лекин ядровий ҳимоячи ролини сақлаб қолаверади.
