Украина президенти Володимир Зеленский жума куни, 12 декабрда Telegram’да Харкив вилоятидаги Купянск шаҳри кириш қисмидаги стела ёнида ўзи суратга олган видеони эълон қилди. Видеода Зеленский шундай дейди:
“Бугун — Купянск йўналиши, бу ерда Украина учун натижага эришаётган жангчиларимиз. Россияликлар Купянск ҳақида кўп нарса гапирган эди — биз кўряпмиз. Бордим, йигитларни қутладим”.
Шу куни аввалроқ украин мудофаа кучлари Харкив вилоятидаги Купянск атрофида муваффақиятли қаршӣ ҳужум ўтказиб, шаҳардаги Россия гуруҳини қуршаб олгани маълум бўлди. Бу ҳақда “Украинская правда” нашри Миллий гвардиянинг “Хартия” қидирув-зарба гуруҳи 2-корпуси қўмондонлигига, унинг қўмондони Игор Оболенскийга ҳамда DeepState OSINT лойиҳасининг янгиланган харитасига таяниб хабар қилди.
“Вазифа шаҳарга кириб, россияликлардан тозалаш эди. Биз бир вақтнинг ўзида 2–3 йўналишда ишладик, уларнинг логистикасини кесиб ташладик. Бугун айта оламизки, россияликлар шаҳарда тўлиқ узиб қўйилган. Улар узоқ вақт нима бўлаётганини тушуна олмади. Аммо ҳозир улар қуршовда эканини билишяпти”, — дея Оболенскийнинг сўзларини келтиради “Украинская правда”.
“Хартия” 2-корпуси маълумотига кўра, Кондрашовка қишлоғи ва унинг атроф ҳудудлари ҳамда ўрмонлар тўлиқ озод этилган. “Хартия”нинг 13-бригада гуруҳи эса Радковка қишлоғи ва унинг атрофини тўлиқ озод этган ҳамда “Купянск шимолидаги шаҳарнинг ўзида бир неча ўнлаб уйдан душманни сиқиб чиқарган”.
“Ҳозир улар (РФ ҚК — таҳр.) бор бўлган барча захираларини ташлаб, мудофаани ёриб ўтишга уриняпти. Лекин биз уларнинг ҳаммасини кўриб турибмиз ва йўқ қиляпмиз. Айтганча, кўп хорижликларни қайд этяпмиз — жумладан Сурия ва Африка мамлакатларидан”, — деди Игор Оболенский.
Миллий гвардиянинг 2-корпусида таъкидлашларича, бир неча ой олдин Россия қўшинлари Купянскка Оскол дарёсидан 6 км ичкаригача кириб келган, натижада шаҳар ва яқин қишлоқлардаги вазият танг бўлиб қолган.
“Украинская правда” билан суҳбатда Миллий гвардиянинг “Хартия” 2-корпуси қўмондони айтишича, ҳудудда россиялик ҳалок бўлганлар сони минг кишидан ошган, ҳозир эса Купянскнинг ўзида улар 200 нафардан ортиқ эмас.
Корпус маълумотига кўра, 22 сентябрдан 12 декабргача бўлган даврда “Хартия” бўлинмалари 1027 нафар россиялик ҳарбийни йўқ қилган, 291 нафарини яраланганлар қаторига чиқарган, 13 нафар “оккупант” асирга олинган. Қўмондонликда “шаҳар марказидаги жанглар ҳали давом этмоқда, аммо кейинчалик Купянск тўлиқ озод этилади”, дейилган.
