34-сонли автобус йўналиши ҳаракат схемасига ўзгартириш киритилди

Тошкент шаҳрида 34-сонли «Чилонзор метроси – Шифокорлар шаҳарчаси» автобус йўналиши ҳаракат тартибига ўзгартириш киритилди. Янгиланган схемага кўра, автобуслар Шифокорлар шаҳарчасидан йўлга чиққанида Қамарнисо кўчаси ва Тошкент ҳалқа автомобиль йўли орқали ҳаракатланиб, Онкология маркази бекатини ҳам қамраб олади.

Фото: Тошшаҳартрансхизмат

Тошкент шаҳар транспорт ва йўл-транспорт инфратузилмасини ривожлантириш бош бошқармаси маълум қилишича, 34-сонли «Чилонзор метроси – Шифокорлар шаҳарчаси» автобус йўналишида ҳаракат схемаси қайта кўриб чиқилди.

Эндиликда автобуслар Шифокорлар шаҳарчасидан ҳаракатни бошлаганда қуйидаги тартибда йўналтирилади:

Қамарнисо кўчаси орқали Тошкент ҳалқа автомобиль йўлига чиқади;
ҳалқа йўлида ортга қайрилиб, Онкология маркази бекатини қамраб олади;
шундан сўнг Қамарнисо кўчаси бўйлаб ўз ҳаракатини давом эттиради.

Мутасаддилар йўловчилардан янгиланган ҳаракат схемасини инобатга олган ҳолда сафарларни режалаштиришни сўрамоқда.